Addisu Adoola
Hawaasa:- Sidaamu Qoqqowi Hookkote Woradira gidu da’muulchi uwinota baatto loosidhe galtino woradu teessano xawissu. Baatto loosidhe galtino Hookkote Woradi teessaanno Itophiyu Pireesete Uurrinshara xawissino garinni; sa’u Lamalanni hanafe bokkissinonna itate meddi yitino badalate laalchi aana haaru gidu da’muulchi uwino.
Kuni da’muulchino Badalate Haanxiicho mure umoo hige badalate giddira eatenni badala itenna sheelshe hunanni no yitino. Teessaano woradaho konni albaannino gidu da’muulchi uwe egennino gede xawisse; ikkollana kayinni tayxe gede bokkissinonna itate meddi yitino badala aana ikkikkinni; badala guffa faaccanno yannara guffate aana ofolle guffa itatenni gawajjo iillishanno. Tayxehu kayinni anfe egenninoommokkiho yitino.
Hasaawa assinummo yanna geeshsha konne qarrano gargarate da’muulcho angatenni mirciishshitine shiiyye yaate gobbanni gashshootu widoonni shiqinonke xagichi dino yitannoti teessaanno; da’muulchu siranni ha’rannoha ikkasinni angatenni calla shine gudate jifo ikkinonke yitino.
Teessaanotenni shiqqinonke hedora tumo afi’rate bilbilloommohu Hookkote Woradi Aantichu Gashshaanchinna Irshunna Kalaqamu Jiro Borro Mini Sooreessi Kalaa Arbo Jaldeessihu isi widoonni; Hookkote Woradira uwino yinanni da’muulchiri halaale ikkinota buuxise; kunino gidu laalchi aana iillishanno gawajjo ajishate loonsanni hee’noommo yiino.
Damuulchino woradu giddo afantanno olluubba mereerinni Sette Olluubbara uwino gedeno coy’rino. Konne da’muulchono angate shino yinoonnihu balalsine di-ikkino;Ikkollana, da’muulcho shaate horonsi’nanni xagga badalate haanxiicho mooshshatenni laalcho gawajjitara dandiitannohura baadillitte hayyonni mannu wolqa horonsi’ne gargarate hendeeti; xaa yannara kayinni xagicho beeha hanfoommo yiino.
Kalaa Abro, xaano ikkiro qara gede amaallannihu da’muulcho mannu wolqanni shaa ikkitinota egensiise; konninni aleenni higeenna xagicho horonsi’nanni ikkiro nafa lowo qoropho assa hasiissanno. Xagicho gananno manchi bisosi diphanna afoonna sanosino foxxoodha hasiissanno.
Xagicho gannanni yannarano qole badalchote bokkisi aana ikkikkinni agashshu aana ikkino gede huwachishino. Sa’u lame dirrara diilallote gade soorramme korkaatinni Hookkote Woradira gidu laalchi gawajaminoha ikkanna tayxe diro biifino gidira golaminonsa qarri baatto loosidhe galtino woraadu teessaanora lowo yaaddo ikkino.
Bakkalcho Ella 8, 2015 M.D
