Abrahaam Saamueel
Addis Ababa:- Aliyye Itophiyira olunni kalaqantino gaance korkatinni jawa gawajjonna haammatu jajji baino; Konne wirro gatamarate 20 biliyoone doolaare hasiissannota xawinsoonni. Konne Itophiyu Wirro Uurrisatenna Gatamarate Pirogiraame albi oombarra faajje assitino.
Itophiya Wirro uurrisanna Ijaarate Pirogiraame faajje assitino yannara, gaancete 28.7 biliyoone doolaarenni bikkinanni jajji ba`nenna miinju hafanfarre iillitinoha ikkanna, jajju ba`ne wirro uurrisatenna ijaarate 20 biliyoone hasiissannota anfoonni.
Wirro uurrisatenna Ijaarate Pirogiraame faajje assitino garinni, woxu Ministeerchi Kalaa Ahimedi Shide xawisinonte gede; mootimma pirogiraame gummaame ikkitanno gede assate mannihimmate kaa`lo iillishatenni sae baajete gante hixamanyite loossanni afantanno.
Wirro uurrisanna Gatamarate loosi mootimmate dhuki callunni loonsanniha ikkinokki daafira, hajo la`annonsa bissa hatono latishshu pirogiraame kaa`laano tini pirogiraame qinaabbanno gede uminsaha dilaala fula noonsata woshshatto assino.
Pirogiraamete loosi aana xaaddote beqqaano ikkkitanno Federaalete Loosu Minna, Ministerootunna gaancetenni gawajjo iillitino qoqqowubba pirezidaantootu hattono kalqete deerinni noo uurrinsha, latishshu irkisaano sooreeyye tini pirogiraame loosantanni noo gara lainohunni hala`ludinni hasaawa assite gutu sumimmera iillitinota Woxu Ministerichi egensiisino.
Amaalamishshu battala illachiishinohu, aliyye Itophiyu ragaani harinsoonni oli korkaatinni iilitino gawajjo wirro uurrisate hasattote kikkishshu xiinxallo aana hasaawa assine manna illachiishino latishsha kaajjishatenna dagoomu xaadooshshe haaroonsate ikkinota xawinsoonni.
Dagoomaho laalchunni, xintu latishshinninna batinyu handaari aana gawajjo iillitinota xawinse, wirro uurrisate wo`naalsha assinanni hee`noonnita qummeessinoonni. Daanno ontu dirira gaancetenni gawajjantino kifilera loonsanniha Itophiya Wirro uurrsate Ijaari Pirogirame faajje assitino.
Itophiyu Mootimma, Kalqete Baankenna latishshu irkkisaano tekiniikete irkonni halamatenni gaance iillishshino gawajjonna huno hattono kalaqqino hasatto giddo karsine taje aatenni gawjjote hasatto keeno assinoonnita caakkeessinoonni.
Bakkalcho Ella 8, 2015 M.D
