Gaazeexu Odeessaanchinni
Addis Ababa:- Gobboomu deerrinni afi’noonnita duuchu handaari qeellenna seyoo hegeraame assate kalaqotenninna ollohisatenni loosa hasiissannota Jireenyu paarte loosu gumulsiisaano komite miilla coyidhu.
‘’Gutu Halaali, Kalaqonna Wiinamu Interpireenere Mootimma Buuxisiisate’’ yitanno massagote hedonni Paartete loosu gumulsiisaanonna mereerima komitenni worroonni faasho aana illachishshino bare tenne lamalara babbaxxitino qoqqowubbara harinsanni hee’noonni. Bareteno Federaaletenna qoqqowubbate luphiimanna mereerima loosu massagaano addi addi qoqqowubba marte beeqqitanni afantanno.
Qoqqowubbate harinsanni hee’noonni bare massagganni afantannori Jireenyu paarte loosu gumulsiisaanonna mereerima komite miilla coyidhanni; ‘’Xaa yannara gobbanke noose qarrinni fushshate hojjinni amandanni halaalinni roore gutu halaale amande babbaxxitino handaarranni kalaqote loossa halashshanna wiinamunni loosa agarranninke’’ yitino.
Konninni, kaajjado mootimma gatamaratenni keere, latishsha, dimokiraasenna mittimma adda assa agarranninsata xawissino. Bilchaatanna murci’raano massagaano kalaqateno xaa yannara qoqqowubbate harinsanni hee’noonni bare noose qeechi luphiima ikkinota coyidhinori paartete loosu gumulsiisaano miilla; ‘’bare Itophiya lophote widira reekkate amandoonni ajuuja gumullanni doogo kalaqate dandiisiissannote’’ yitino.
Bareteno, woraddatenni kayse qoqqowubbate deerrinni noori mereerimanna luphiima massagaano beeqqitanni nooha ikkanna; paaretenniri mereerima komite wortino faasho garinni qoqowubbatenna gobboomitte hajubba aana torbitanni noota afate dandiinoonni.
Qoqqowubbate harinsanni hee’noonni barehu qaru illachino qansootu keerenna hobbaate agarsiisate, latishsha wiinama assate, dancha gashshoote halashshatenna dagoomitte mittimma kaajjishate ragaanno gobboomu deerrinni afi’noonni qeellenna seyoo kaajjinshe sufisiisate hattono loossate guffa ikkitannore bande rahotenni tiratenni mixotenni amandoonni loossa kalaqote irkisatenna wiinamunni gumulatenni gummaamma loossa gumulate ikkinota xawinsoonni.
Bakkalcho Ella 8, 2015 M.D
