Addisu Adoola
Hawaasa:- Itophiyu gobboomu amaalammete komishiine babbaxxitinore dagoomu bissa riqibbe amaalammete aana beeqqitanno miilla filate bare shoole qoqqowubbaranna mittu quchumu gashshootira harisa hanaffino.
Itophiyu gobboomu amaalammete komishiine babbaxxitinore dagoomu bissa riqibbe amaalammete komishiine aana beeqqitanno miilla filate bare Sidaamu, Hareri, Gaambeellahonna Wodiidi Galchimi Itophiyi qoqqowubbara hattono Diredaawu quchumu gashshootira harisa hanaffino.
Sidaamu qoqqowira harinsanni hee’noonni bare aana afaminohu Itophiyu gobboomu amaalamme komishiine komishinere Dokter Tegeny Geexuhu; gobboomu amaalammete komishiinehu qaru illachise qara qara ikkitino gobboomu hajubba aana, sumimmete iilline gobba alba qolle sufisiisanna ga’labbi yitino heeshsho massagate yiino.
Amaalammete komishiine gaamote gambooshshe di ikkitino yinohu komishinerchu; barete illachino baalanta dagoomu bissa riqibbe amaalammete aana beeqqitanno bissa fila ikkinota huwachishinno. Noo qarra hasaawunni tirantenni urde kayisa gara di ikkitino; badhera qolte goshooshshannote yinohu komishinerchu; hasaawaho waalchonsa cuffino gobbuwa qarransa urdetenni tidhate dandaaminonsakkita Sooriyunna labbino gobbuwanni la’’a dandiinanni yino.
Itophiyu gobboomu amaalammete komishiine jawiidi ogeessi kalaa Xibebu Taaddesehu isi widoonni; komishiine uurrinsoonnihu gobbate deerrinni qara ikkitino hajubba aana noo badooshshe mittowa qolateeti yino. Ba’rete aana babbaxxitino dagoomu bissanni filantino beeqqaano afantinoha ikkanna xaa geeshsha komishiinete harinsho gummaame ikkase xawinsoonni.
Bakkalcho Ella 8, 2015 M.D
