Amsaalu Felleqe
Addis Ababa:- Sidaamu qoqqowira saadate jiro latishshinni handaara woyyeessatenni qansootahono loosu kaayyo kalaqa dandiinoonnita Qoqqowu Saadate Jiro Latishshi Biiro egensiissu.
Biiro, qoqqowu Irshunna kalaqamu jiro latishshi biiro ledo halamatenni qoqqowu giddo saadate latishshinna woloottano giwirinnu handaarranni laashshinoonni laalcho Addis Ababu saynsete muuzeemera giwirrinnu saynse reqeccora shiqishshe daa’’atisiissino.
Biirote sooreessi kalaa Tekle Jomba; tenne yannara baxxinohunni, Itophiyu Pireesete uurrinshara xawisino garinni; qoqqowoho saadate jiro latishshi handaarinni woyyaawino laalchonna laalchimma afi’ra dandiinoonniha ikkanna; haammatu qansootirano handaarunni loosu kaayyo kalanqanni hee’noonni.
Amandoonni baajeettete dirinnino lukkuwu jiro latishshi widoonni 3 miliyoone 800 kume ikkannore 1 barri caacurre wedellu loossitanno gede assatenni tuqisate mixi’ne loonsanni hee’noonni. 1 barri caacurre lossitannori wedellaho yiinohu kalaa Tekile; konni handaarinni 1700 ikkitannori Yuniversitetenna Kolleejjuwatenni maassante fultino wedellira uurrinshunni loosu kaayyo kalanqoonnita xawisino.
Adote jiro latishshi handaarinni konni albaanni loosu kaayyo kalanqanni kaayyo nookkita kulinohu sooreessu; xaa yannara kayinni Qoqqowoho Yirgaalamete Agro Industire paarkera kalaqantino kaayyonni, Addis Ababunna wolootta qooxeessuwannino adote laalchi hasatto lexxitanni dagginoha ikkasinni, loosidhe galtinori, dureeyye, mittimmate loosi maamarra, Interpirayzootu jawaatte millisa hanaffinohura adote latishshi loossano hakkonni bikkinni lossate illachinshe loonsanni hee’noonnita egensiisino.
Qoqqowoho xaa yannara adote jiro latishshi handaarinni calla 4 kume 700 ale ikkitannori Yuniversitetenna Kolleejjuwatenni maassante fultino wedellira loosu kaayyo kalaqa dandiinoonnitano kalaa Tekile xawisino. Qulxu’mete latishshi widoonnino, loosidhe galtinori gatenna Garbuwate qooxeessira laashshinanniha ikkanna; konni dirinni calla 280 loosidhe galtinori gate qulxu’me ce’anno gede assatenni eonsa woyyeessidhanno gede assinoonni.
Xaa geeshsha Abbaayyunna Hawaasi Garbuwara wedella Interpirayzetenna mittimmate loosi maamarranni tantanne loosu giddora eessinoommo yiinohu Sooreessu; Abbaayyu Garbira 150 wedella; hattono Hawaasi Garbira sase mittimmate loosi maamarranni 210 wedella tantanneenna qulxu’mete laalcho laashshitanni mereerima dikkora shiqishshanno gede assatenni loosu kaayyo kalanqoonnita coyi’rino.
Malawu latishshinna Diidu ceattonni, hattono woloottano saadate jiro latishshi handaarranni xaa geeshsha loonsoonni loossanni laalchimma lexxitanni dagginoha ikkanna wedellu kuri handaarranni bobbakke loosidhanni heeshshonsa woyyeessidhanno gede assate Biiro haja la’annonsa bissanni ledo jawa illacha tugge loossanni afantannota lede qummeessino.
Bakkalcho Ella 8, 2015 M.D
