Amsaalu Felleqe
Addis Ababa:- Tayxeeha haanju harumi kaashsho gundeemmo woyte Itophiyu 31 biliyoone chigginyenni uddidhanno yaanni Xaphoomu ministirchi Abiy Ahimed (Dr) coyi’ri. Xaphoomu ministirchi Abiy Ahimed (Dr) balaxaancho mootitte Zinnaash Taayyaacho ledo tenne lamalara Yekka ilaalira Apilete chigginye kaassino.
Xaphoomu ministirchi tenne yannara coyi’rino garinni; Yekka ilaalira afantannota Baarzaafe haqqe buqqinse hoolatenni 100 kume Apilete chigginye kaasate mixo amandoonni. Baarzaafetenni diwantino base Apilete kaashshinni dimbummoro umihunni haanja haruma worreemmo; laynkihunni qooxeessu sagalimmate ikkannore laashshinanniwa ikkanno. Wole widoonnino loosu kaayyo kalaqate injaanno yiino.
Wolootta basera kayinni Burtukaane, Mandariinenna wolootta laalo kaansiro sasenna onte dirra gedensaanni sagalete wowe lainohunni ka’anno hajubbara dawaro qolate dandiisiisannota coyi’rino. Hakkiinnino sae, baychu eote buicho lossi’rate kaa’lanno yiinohu Xaphoomu ministirchi; tayxeeha haanju harumi kaashsho gundiro Itophiyu 31 biliyoone chigginyenni uddidhannota coyi’rino.
Aantanno shoole hawadi yannara 50 biliyoone chigginye kaasa dandiinanni. Kuri giddonni 3 biliyoone sagalimmate horora hossannota ikkituro sagalete wowe buuxisiisate loossanni luphiima guma maareekkisiisa dandiinannita xawise; konni albaanni manna kakkayisatenni, chigginye qixxeessatenninna bale umme kaasa qarrahonkanni.
Xaa yannara kayinni bacu manni qooxeessisira chigginye kaasa hanafinohura haanju harumi loossa egennotenni massaga hasiissanno yiino. Egennotenni yinanni woyte; umihunni, kaansanni chigginye lattannota qooxeessa gawajjitannokkita, sase dirra gedensaani intannita ikkase buuxa hasiissanno. kaansanni chigginye qooxeessu agarooshshiranna biinfillira calla ikkikkinni loosu kaayyo kalaqqannonna sagalimmate ikkitannota buuxa hasiissanno yiino.
Xaa yannara Abukaadote laalchinni Itophiyu Afriku gobbuwanni layinki deerrira afantanno. Aantanno yannara haanju latishshinni, gummate laalonninna sagalete wowenni meessaneete dandaate hajubba laynkinna sayikki deerra yinannire galchine sa’’a noonke. Korkaatuno, Itophiyu konne assate dandiisiisanno jiro noosete. Konnira, kaajjine loosatenni soorrama hasiissanno yiino.
Konni ragaannipoletiku laooshshi badooshshe, yannitte hajubba, jirote hajo baala tiro diafidhinote. Konne loosannohu ga’a ilamara loosannoha ikkasinni ilamate dancha safo tugate mootimma dinjiitannonke yitanno hedo gara dikkitino. Techo koffi yine ga’a ilama koffi assa dihasiissanno. Xa noo hajo aana sumuu yaatenni, araarunni ikkinnina aantanno ilamara qarra iqqa dihasiissanno yiino.
Albiti dagoomitte, miinjunna poletiku qarrubba techono qarrammeemmo gede assitinonke. Ninkeno labbanno doogonni ilamate qarra iqqineemmokki gede qoropha no one yiinohu Xaphoomu ministirchi Abiy Ahimed; xa loonseemmo loosi gobbatenna ilamate ikkannota buuxa hasiissanno. Tenne hedonni haanju harumi loossa sufisiisa hasiissannotano huwachishino.
Bakkalcho Ella 8, 2015 M.D
