Qiddist Gezaheny
Addis Ababa:- Biraazilete gobbayidi hajo ministirchi Mawuro Viyera gobbasi Afriku gobbuwanna Afriku mittimma ledo noose xaadooshshe wirro kaajjishate hasidhannotanna, tenne gumulora Itophiyu jawa qeecha afi’rinota egensiisino.
Gobbayidi hajo ministirchi Mawuro Viyera Itophiyu Pireesete Uurrinsha ledo assino hasaawinni; Biraazile Afriku gobbuwanna Afriku mittimma ledo noose xaadooshshe wirro haaroonsate assitanno sharro gobbasi gobbayidi hajo poolise qara e’’onni mittete.
Afriku gobbuwanna Afriku mittimma uurrinsha ledo kaajjado Dippiloomaasete hasaawa assatenna halamme lossate Biraaziile Itophiyaho uyitanno illachi luphiimaho yino. Biraazilenna Itophiyu batinye kalqete yannate mitiimma aana gutu hedonna ajuuja beeqqitannota xawisinohu gobbayidi hajo ministirchi; kuri giddonni sufo noo latishshi mittoho yino.
Konnirano doorshu nooha baatooshshu amanyoote qixxeessa hasiissannota lede xawisino. Pirezidant Lula Da Silva lophitanni noo gobbuwa mereero nooha daddalu xaadooshshe kaajjishate dandiissanno doorshuwa qixxeessate hasiishshi aana yekkeeramaanchoho. Soojjaati Ameerikira noo gobbuwa ledo noonketa daddalu soorro mittu doorshi gede assine adhinannite.
“Haammata daga ba’re aana nooti Poletiku amaalenna qinaawo lamenti gobbuwa lophitanni noo gobbuwa gede noonketa gutu ajuuja kaima assatenni xaadooshshensa roorenkanni kaajjishidhara hasiisanno handaarraati” yino; Mawuro Viyera. Hayyote halamahu wolu hasiisanno xaadooshshu mayimma ikkase qummi assinohu gobbayidi hajo ministirchi Mawuro Viyera; ‘ Ninketi halammete hanqafo qoqqowu giddo gummaamete. Gibrinnunna sagalete laalchi Biraazilete hayyote halamme qaddo qooxeessu dagawa badooshshe abbino handaaraati.
Itophiyunna Boole kalqoomu horophillu fooliishshi’ranno base Afrikaho qaru mereershimmanni kaajjisha Turizimete widoonni noo xaadooshshe lossate kaayyo kalaqqannota xawisinohu gobbayidi hajo ministirchi; mereershu Isiyanna mereerimi soojjaato hodhitanno Biraazilete qansootira ikkado doorsha ikke afamino. Kunino Turizimete lolanke woyyeessate lowo kaayyo kalaqanno yino.
“Yanna seedinsoonni kalqoomu buuwattote xaadooshshi giddo Itophiyu giddo shiima barrubbara keeshshate hasidhanno Biraazielete dagara daa’’atote paakeeje uyitanno gede Viisunni injeessate widoonni mitteenni loosa noonke” BRICS; kalqoomu ba’re aana ikkado heewisamaancho ikka dandiitinohu harancho yanna giddooti yinohu Ambaasaadder Mawuro; miilla iillitinonsata qara qara xiiwonna xaphoomunni lophitanni noo gobbuwa gutu sumimme aana iillate dandaansa gumaati yino. Wodiidi Afriki miilimmatenni afamase ahigurete ledo assinanni xaadooshshe woyyeessitannota coyirino.
Biraazilenna wodiidi Afriki faranjootu 2024 nna 2025 nni gaamo 20 Pirezidaantimma adhitannota xawise, Afriku gobbuwa ledo ikkatenni BRICS gutu illacha egensiisate widoonni roore qeecha fultannota; kunino lamente gobbuwa mereero gamba yaanna halamme kaajjishshannota xawisino.
Xaphoomunni Afriku diilallote gade soorronninna buxima ajishate hattono taalleenya halashshate harinsho aana qarra mitteenni olamate loossannota qummi assino. Biraazilete gobbayidi hajo ministirchi towanyosinni umikki barra xaphoomu ministirchi dokter Abiy Ahimedihunna layinki xaphoomu ministirchinna gobbaydi hajo ministirchi Demmeqe Mekonninihu hattono wolootu jajjabbu mootimmate loosu sooreeyye ledo xaadino.
Bakkalcho Ella 1, 2015 M.D
