Amsaalu Felleqe
Addis Ababa:- Qoqqowoho xaa yannara 54 hekitaare baatto aana makimaanote laalcho laashshinanni hee’noonnita Qoqqowu Laynki Pirezidaantichinna Irshunna Kalaqamu Jiro Latishshi Biiro Sooreessi kalaa Maasreshsha Beqqele coyi’ri.
Biirote sooreessi kalaa Maasreshsha baxxinohunni IItophiyu pireesete uurrinshara xawisanni; qoqqowu bunu, shaetenna makimaanote laalchinni egennaminoha ikkanna; 200 kume hekitaare ale baatto aana Shaete laalcho hattono 54 hekitaare baatto aana makimaanote laalcho hala’ladunni laashshinanni hee’noonni yiino.
Qoqqowoho laashshinoonniha babbaxxino giwirinnu handaari laalchuwano sa’u muli barrubba giddo Itophiyu sayinsete muuzeemera shiqinshe daa’’atisiinsoonniha ikkanna; baatto loosidhenna saada ceidhe galtinori, giwirinnu ogeeyye, hattono sooreeyye giwirinnu reqecco aana leelte beeqqatenni giwirinnu handaarinni wolootta qoqqowubba rosichono adha dandiinoonniha ikkasi qummeessino sooreessu. Kalaa Maasreshsha xawishshi garinni; Wodiidi Galchimi Itophiyi qoqqowira 565 kume hekitaare ale baatto aana buna hala’ladunni laashshinanni.
Tenni reqeccono qoqqowu egennaminoha bunu, shaetenna babbaxxitino sagalimmatenna xaginaateho horoonsi’nanni makimaanote laalcho egensiisate kaayyo kalaqqinota ikkaseno coyi’rino. Wodiidi Galchimi Itophiyi qoqqowira haammata giwirinnu handaari laalchubba laashshinanni yiinohu kalaa Maasreshsha; qoqqowoho 1.5 miliyoone hekitaare baatto aana uurrinshu yannate laalcho laashshinanniha ikkasi egensiisino.
Wodiidi Galchimi Itophiyi qoqqowi gobbankera Shaete laalcho hala’ladunni laashshatenni gobbaydi dikkora soyaatenni egennamino qooxeessa ikkasinni; 200 kume hekitaare ale baatto aana Shaete laalcho; 54 kume hekitaare baatto aana makimaanote laalcho laashshinanni hee’noonni.
Uurrinshu laalcho 780 kume hekitaare ale baatto aana laashshatenni baxxinohunni Buna, Shaena Makimaanote laalchuwa gobbate luphiima ikkinoha gobbaydi woxu soorro abbitannore ikkansanni ruukkado baatto aana batinyunni laashshatenni loosidhe galtinori eono hakko bikkinni lophitanno gede kaa’litannota huwachishino.
Qoqqowu Diidu jiro latishshinni 1.5 miliyoone ale Diidu…. afamannowa ikkasinni malawu laalcho gobboomu laalchinni xibbuunni 40% ikkannowa laashshinanniwa ikkasino xawisino. Gobboomu deerrinni qixxaabbinoti giwirinnu sayinse reqeccono gobbankeno ikkito qoqqowinke baca kalaqamu jiro dhuki noonseta ikkase leellishannote yiinohu kalaa Maasreshsha; giwirinnu loossa yannitte hayyonni irkisatenni harancho yanna giddo laalchonna laalchimma lossate hixamanyine loonsannita kulino.
Bakkalcho Ella 1, 2015 M.D
