Abbabech maatewoos
Gobboomu amaalammera sase qoqqowubbaranna Dirredaawu gashshootira beeqqaano badate looso gumullanni hee`noonnita amaalammete komishiine egensiissu. Gobboomu amaalamme komishiine komishiinerchi dokiter Ambaye Ogato Itophiyu pireesete uurrinshara xawisino garinni; gobboomu amaalammera beeqqaano badate loosi Sidaama, Wodiidi galchimu Itophiyira, Hareri qoqqowubbanna Dirredaawu quchumi gashshootira gumulamanni no.
Dokiter Ambaye xawishshi garinni; badate loosinni amaalammetenni beeqqanno manna badatenni ledote qoqqowu deerrinni amaalammete ajanduwa dooramino manniwinni gamba assinanni. Badate loosira Sidaamu qoqqowira afamannohu dokiter Ambaye qoqqowoho gumaamma ikkitino balaxote loossa gumulanni noota xawise; worroonni loosu harinsho garinni addinni fushshatenni komishiine irkissanno gede bande worroonni lamala halamaano bissanni 400 ale mannira lame barrubbara qajeelsha uyinoonnita buuxisino.
Wodiidi galchimu Itophiyinna Hareri qoqqowubbara hattono Dirredaawu quchumi gashshootirano addira fushshate loosi danchu garinni gumulamanni noota xawise; dagoomuno baqqeenyunni beeqqanni afamannota coyi`rino. Baalante qooxeessuwara bande fushshate loosi woradu deerrinni gumulamannota xawisinohu dokiter Ambaye mittu mittunku woradi konni albaanni hasaawunni addinni bande fushshinoonni honse dagoomu kifillanni mittu mittunkunni 50 manna bande woraddatenni 450 manna zoonete deerrinni assinanni umi hasaawira doorrannita xawisino.
Woraddatenni doorante zoonete quchummara assinanni hasaawinni beeqqanno meentunni, wedellunni, iddiretenni, qooxeessu geerriwiinni hattono wolootta dagooma qiribbanno yine bandoonni bissanni ikkasi kulinohu komishiinerchu; zoonete deerrinni assinanni hasaawinni mittu mittunku dagoomu kifilenni dooramanno lamu manni qoqqowu deerrinni assinanni hasaawinni beeqqaano ikkannotano buuxisino.
Amaalammetenni beeqqitanno gede doorranni manni dagooma riqibbannore, koo/tee qeecha agarinoha, bisu xe`ne noonsare beeqqisinonna poletiku paartuwa beeqqisiisinoha ikkanno gede yanna adhine loonsoonnita xawisinohu dokiter Ambaye gumaamo ikkanno addiinni bande fushshatenni komishiine irkissanno gede qooxeessubbatenni bandoonniti poletiku paartuwa, siiviikete maamarra, iddire, rosiisaanote maamari, woradu gashshooti, yooaasine, gobbate geerrinna amma`note annuwi addira fushshatenni komishiine komishiine irkisatenni mitteenni loosate qajeelsha adhite qixxaabbinota coyi`rino.
Dagoomu tenne gobba qarrira tirote yee ammanatenni amaalamme quqquxammetenni agaranni no yinohu komishiinerchu loosu gumaamimmara baalunku dandaannore assanni afamannota coyi`rino. Dokiter Ambaye yaanno garinni; xa hananfoonnihu beeqqaano addira fushshatenna albiidi ajanduwa gamba assate loosi qoqqowubbate hala`linyi garinni babbaxxannoha ikkanna Sidaamu qoqqowira 15 barrubba giddo goofanno yine agarranni.
Ga`labbote qarri noonsakki qoxeessubbara aantete beeqqaano addira fushshate loosi gumulamannotano buuxisino. Gobboomu amaalamme gobba noo qarri giddonni fushshara dandaanno jawa kaayyooti yiinohu komishiinerchu miidiyubba daga beeqqitanno gede kakkayisate looso loosatenni assitanni noo qeechira galata shiqishe aanteteno konne looso kaajjishshe suffanno gede woshshatto shiqishino. Gobbate keere buuxisiisate gobboomittete amaalammera duuchunku qeechasi fula hasiissannotano lede qummeessino.
Bakkalcho Ella 1, 2015 M.D
