Qiddist Gezaheny
Qoqqowoho tayixe hawadi yanna dancha fajjo owaantenni 1.5 Biliyoone birri ale mootimmate fulo gatinsanni yine hendannita Sidaamu qoqqowi meentu, wedellunna dagoomittete hajo biiro xawissino. Biiro tayxeha hawadi dancha fajjo owaante looso hanafate dandiissanno qixxaawo assinanni hee’noonnitano egensiissino.
Qoqqowu meentu, wedellunna dagoomittete hajo biiro layinki sooreessinna wedellu handaari sooreessi kalaa Desta Leggesehu Bakkalcho Gaazeexi ledo bilbilunni hasaawa assinoha ikkanna; tayixe hawadi yannara babbaxxitinno loosu handaarranni gumullanni dancha fajjo owaantenni 1.5 Biliyoone Birri ale Mootimmate fulo gatisate mixo amandoonnita qummi asse; konni loosirano xaphoomunni 650 kumi ali daga beeqqisiinsanni yine agarrannita qummi assino.
Tayixe Shoolki yannara gumullanni hawadi dancha fajjo owaantenni 13 loosu daninni owaante uyinannita qummi assinohu sooreessu, xaphoomu ministirchi kakkayishshinni gumullanniha haanju harumi looso lede fayyimmate owaante, hawadi roso aanna quchumu biinfille agara qarunni kullannireeti. Ledoteno dagooma hanqaffino owaante giddo gumullanniri qarraminoha kaa’late, hurbaate itisate, mundee aate uyine kakkayisanna dhuka afidhinokki rosaanora rosu uduunne wonsha afantannotaati kalaa Desti Bakkalcho Gaazeexira xawisinohu,
Tenne owaantenni sa’u yannara 450 ali minna minatenna haaroonsate looso gumulloonnita lede coyi’rino. Konne looso jawaachishateno wedellu handaari woraddate geeshsha dirre latishshu maamarra ledo halamatenni harunsatenna irko assate looso loosannota xawisinohu kalaa Desta; tayixe hawadi dancha fajjo owaantenni 1 Miliyoone ali daga horonsi’raano ikkitanno yine agarrannita coyi’rino.
Kalaa Desta xawishshi garinni; sa’u yannara loonse sa’noonniti mitte mittenti loossa techo badhera hinge la’nanni woyte gumaho; woxunni loonsannikkihu haammatu loosi shiima yanna giddo dancha fajjaaleeyyenni gumulaminno. 450 dhuka afidhinokki daga mini minamasino sa’u yannara loonsoonni loossanni afi’noonni guminni lawishshu gede kaysa dandiinanniha ikkasino xawisino.
Konninni ledote daga konne hawadi dancha fajjo looso rosicho assidhe hadhanni nootino gumu gede la’nannite yaatenniiti sooreessu uurrinshankera xawisinohu. Tayixeta hawadi dancha fajjo owaante looso albiidinke Ella 2015 M.D giifomarchinni kayinse Maaja 2015 M.D agani hanafo geeshsha noo yanna giddo hananfannita kalaa Desta uurrinshankera uyino mashalaqqenni buuxisino.
Tenne odoo qixxeesinummo yanna geeshsha Tayxeta hawadi dancha fajjo owaante looso hananfanni barra mucci assine murroonnikkitanna, aleenni xawinsi yanna giddo hananfanni yine hendannita kalaa Desta tenne mashalaqqe uyinke yannara huwachishinno.
Bakkalcho Ella 1, 2015 M.D
