Abbebech Maatewoos
Addis Ababa:– Haaru Yuniveristubbate umonsa gashshate lallawi gobbate rifoormete biso ikkasi gobbaanni rosu baatooshshi aana gashshanno hi`naancho xiiwo nooikkita dagate riqiwamaano amaale mini mannu jiro wolqa latishshi, loosu bobbaasonna tekinoloojete hajubba uurrinshu komite gambisaanchi dokiter Negeri Leenco egensiisi.
“Haaru Yuniveristubbate umonsa gashshate lallawi gobbate yannate heeshshote akata hedote wirinokkiha ikkasi baxxinohunni buxane dagoomu kifilla baaxxite rosa didandiitanno” yaannohunni mitu mitu manni kayissanno abbooshshe lainohunni Itophiyu pireesete uurrinsha dokiter Negeri Leenco ledo keeshsho assitino.
Dokiter Negeri xawisino garinni; lallawu kaimi gobboomu rifoorme biso ikkanna gawalote tumo qole gobbannita rosu islaanchimma buuxisate. Yuniverisitubba umonsa dandiite rosiissanno woyte konni albinte gede mootimma gaantinonsa rosaano adhitannoha ikkikkinni dandoo kaima assino garinni adhitanno. Jawiidihunna qaru adhate la`nannihu woxu dhuka ikkikkinni rosaanote dhuka ikkasinni heeshshote deerri xiiwo heedhannokkita huwata hasiissanno.
Yuniverisitubba umonsa gashshitannore ikkitu yaa mootimmannita ikkansanna mootimmate baajeette gobbaanni wo`munni wo`ma uminsanni galtannore ikkitinokkita egennama noosi yiinohu dokiter Negeri; konni kaiminni mootimma baajeette gaamtannohu dhukinsanni heewisamaano ikkitino kayinni qole baatte rosa dandiitannokki rosaano rosiisateno ikkasi huwachishino.
Uurrinshuwa umonsa dandiitanno woyte fayinaansete gashshootinni, mannu wolqa tantanonni, mootimma gaamtannonsata cufote baajeete lede ayino mereeroho anga worikkinni wolaphotenni loosu aana hosiissanno gede lallawunni kaajjinshoonnita xawise; ikkolla ikkinnina loosu hayyo xabbinotanna taaltinota ikkase harunsitanno chaansiler yinanni aliidi bisi hattono boorduwa noohura hajo wolapho xa`mamooshshu ledo uyinoha ikkasinna b e e q q i s a a n c h i m m a n s a n o la`nannita ikkase coyi`rino.
Yuiniverisitubba heewisamaano rosaano adha calla ikkikkinni woyyitino owaante aate heewisamaano mannu wolqa woyyino damoozinni hiitte gobbannino qaxara dandiitanno. Rosaano rosse fultanno woyte kalqete deerrinni heewisamaano loosaasine ikkitanno gede assate aleenni heewisamaano rosaano kalqete gobbuwanni xuruurate ragaannino luphiima yawonni loossanno.
Meessa dandaa shota gede ikkitanno hajo ikkitukkinni duucha jironni woyyino deerri aana ikka xa`manno yiinohu gambisaanchu; konni ragaanni bashshono Atse Hayile Sillaase gashshooti yannara umosi gashshinohunna xaano woyyitino uurrinsha aana noohu Addis Ababu yuniverisite lallawi garinni umosi gashshannoha ikkate umi basera famannota egensiisino.
Lawino garinni Addis Ababu yuniverisite gede umi ilate yuniverisitubba yinanniri Haromaayu, Jimmu, Bahirdaare, Gonderenna Hawaasi yuniverisitubba umonsa gashshitannore ikka dandiitannota kule; woloottano harinshotenni heewote giddora e`annota kayisino. Tini uurrinshuwa rosanna rosiisatenni calla uurritannore ikkitukkinni eote dhukansa lossateno babbaxxitino ogimmate handaarranni bobbaasansanni uminsa sae dagoomaho hattono gobbate lophora tirfitannoreno ikkitanno yiino.
Bakkalcho Ella 1, 2015 M.D
