–Reqecco 88 kumi daa’’ataano daa’’attino
Abrahaam Saamueel
Addisi Ababa: – giwirinnunna saayinsete reqecco aana shiqqino tekinooloojenna kalaqote looso baalante qoqqowubbara iillitanno gede assate harunso assinannita Giwirinnu Ministeere egensiissino. Reqecco 88 kumi daa’’ataano daa’atteenna jeefo afidhino. Saayinsete muuziyeemera, “Wo`naalshu mininni laalchu widira” yaanno uminni 28 barrira harinsanni keeshshinoonni giwirinnunna saayinsete reqecco sa`u lamalara jeefo afidhino.
Reqecco goofase lainohunni Giwirinnu Ministeere Dr Girimi Ammentehu uyno xawishshi garinni, reqeccote aana shiqqinore giwirinnu tekinooloojete uduunne qoqqowubbate iillitanno gede assine jawa soorro abbate hala`lado wo`naalsha assinanni. Reqecco roorino loosira kakkaayissanno hedo, tekinooloojenna addi addi kalaqote loosi uduunni shiqinota qaagiisse, giwirinnu looso woyyaawino garinni gummaamo assate kaa`litanno hedonna huwanyono kalaqantinota kulino.
Giwirinnu Ministeere albillichote reqeccote aana shiqino uduunne roorenkanni gummaamma assate qoleno iillado ikkanno gede harunsonna irko assinannita xawisino. Haanju latishshinni, quchummate giwirinninni, maatete jireenyinninna wolootunni afi`noonni gummanna tekinoolooje kaajjite suffanno gede loonseemmo yaanni Ministirichu coy`rino.
Ministirichu caakkeessino garinni, reqecco 28 barra fano assine keshshinoonni; rosaano, wedellu, xiinxallaanonna hajo la`annonsa bissa giwirinnu hiittoonni hanafami? Xa noo deerranna albillichote harinsho maa labbanno? yitanno hajubba mitto bayicho worreenna harunsa dandiitino. Gummaame reqecco aana 88 kumi daa’’ataano daa’’attinoha ikkanna; konni giddo 45 kumi labballu, 43 kumi meentu daa’’attinota egensiisino.
Reqeccote qote qoteho, qoqqowubba qooxeesinsara noo jironna laalcho daa’’ataasineho leellishshino yiinohu Dr Girimi, ledoteno giwirinnu ledo amadantinota paanaleete hasaawano assinoonnita qummeesino. Hasaawu aana konne handaara yannicha assate, albillicho giwirinna lossate kaa`litanno hedo loosu aana hosiisate Ministeere loossannota buuxisino.
Reqecco lainohunni daa’’ataasinuwiinni hedo haa`noonnita xawise, tini reqecco suffinota ikkitanno gedenna qoqqowubbateno togoo reqecco labbannota qixxeessinanni gede xa`mitino yiino. Tenne reqecco, giwirinnu Ministeere, Giwirinnu Haaroonshi Uurrinshanna Itiyo telekoome gutunni qixxeessitino reqecco qinnabbanno gede kaa`litino bissa baalate afamishsha uynoonni. Xaphoomu Ministerichi Dr Abiy Ahimedihu Dotteesa 29, “Wonaalshu mininni laalchu widira” yaanno hedonni qixxaabbino giwirinnunna saayinsete reqecco maassi’re faninoti qaangannite.
Bakkalcho Ella 1, 2015 M.D
