Amsaalu Felleqe
Addis Ababa:- Sidaamu qoqqowira xaa yannara Yuuriyu harishsha anje noota Qoqqowu Irshunna Kalaqamu Jiro Biiro egensiissu. Qoqqowoho loosidhe galtinori mite mite woradda teessaano bushshu harishsha /Madaabbaru/ anjenni baattonsa wixunni dibbinokkita kulte kayissino hedo kaima assatenni sa’u lamalara Qoqqowu Irshunna kalaqamu jiro biiro hajo la’annonsa bissa hasaawinse odeessinoommoti qaangannite.
Hedonsa Itophiyu Pireesete Uurrinshara uytinori mitu mitu baatto loosidhe galtinori qoqqowu teessanno coyidhanni; baattonsa loosse qixxeessitinonna wixa baattote tugginoha ikkirono; laalchonna laalchimma lossi’rate kaa’lannonsaha bushshu harishsha anje kaiminni mitii’mitinota kultinno.
Hedonsa Bakkalcho Gaazeexira xawissinori mereerinni Shabbadini Woradira; ‘’Ninkewiinni agarranniha baatto loosi’ne qixxeessi’ne wixi’ne agadhinummorono, Yuuriyu madabaaru anje korkaatinni xaa geeshsha qarrammoommo yitino.
‘’Harishsha adhate borreessammeenna uynoonketi 10 kiilooti; konne adhate duucha yannara raataambommo. Baattonke qixxeessi’noommo bikkinni afi’nanni hee’noommo harishsha dikkadote; tenne yannara baatto loosi`re kae laalchimma ledannoha bushshu madaabbara hasi`ratenni yannanke giiranni hee’noommo’’ yitanniiti woxarattinohu.
Qoqqowoho baxxinohunni, Yuuriyu harishsha anje xaaddinota Itophiyu Pireesete Uurrinshara xawisinohu Qoqqowu Irshunna Kalaqamu Jiro Latishshi Biiro Sooreesi Kalaa Memmiru Moke; xaaddino xe’ne tirate Giwirinnu ministerenni ledo hasaambanni loonsanni hee’noommo yiino.
Sidaamu Qoqqowira tayxe dirinni goyirete yanna looso lede 152 kume kuntaala NPS hattono 113 kume kuntaala Yuuriyu harishsha tuqisate mixo amandoonniha ikkanna; konni giddonni arri yannara 83 kume kuntaala NPS harishsha shiqqinote giddonni 74 kume kuntaala horoonsi’noonni. NPS harishsha ragaanni xe’ne dino yaanniiti Sooreessu coyi’rinohu.
Ikkollana, loosidhe galtinorira shiqa hasiissannohu Yuuriyu harishsha 113 kume kuntaala ikkanna; konni giddonni 38 kumi kuntaali callu shiqino. Kuni yaa, badheessu loosira hasiisannohunni la’niro qoqqowinkera xa noo akati garinni Yuuriyu harishsha anje no yiino.
‘’Qoqqowoho badheessu loosira calla 60 kume kuntaala Yuuriya horoonsi’nanniha ikkanna; xaa geeshsha shiqinohu 38 kumi kuntaali giddonni 9 kume kuntaala horoonsi’noommo. Kalaqantino anje tirateno Federaalete Giwirinnu ministere ledo hasaambeenna worroonni faasho garinni xaa yannara 30 kume kuntaala Yuuriya wolootta qoqqowubbanni adhineemmo gede fajjineenna qoqqowho eessate looso hananfoommo’’ yiino Biirote Sooreessi Kalaa Memmiru Moke.
Tenne yannara Maagaazenete nooha Yuuriyu harishsha garunni horoonsi’nanni hee’noonniha ikkirono; hasiissannoti harishshate duuno dinonke yee; xaano Yuuriyu harishsha anje xaaddinonketa tirate hajo la’annonsa bissanni ledo qinaambe loonsanni hee’noonnita lede xawisino.
Bakkalcho Ella 1, 2015 M.D
