Abrahaam Saamueel
Addis Ababa:- Qoqqowoho daanno hawado 365 miliyoone chigginye kaasate mixo amande qixxaawo gundoonnita Sidaamu Qoqqowi Qarqaru, Dubbunna Diilallote Gadi Soorro hattono Irshunna Kalaqamu Jiro Biiro egensiissino.
Kaansanni chiginyeno duuchu dani horo aana hossannota lamente Biiro sooreeyye egensiissino. Lamenti Biiro baxxinohunni Itophiyu Pireesete Uurrinshara xawissino garinni; daanno hawado haanju harumi pirogiraame qinaabbinota assate gutunni hala`lado qixxaawo assite loosu giddora e`inota egensiissino.
Qoqqowu Qarqaru, Dubbunna Diilallote Gadi soorro Biirote Sooreessi Kalaa Shittaye Yumuri xawisanni; 2015M.D hawadi yannara Qoqqowu deerrinni nirinni woyyaawino garinni hala`lado qixxaawo assine haammata loossa loonsoonnita xawise; dubbu owaantera calla ikkitannota 165 miliyoone haqqu chigginye kaasate qixxaabbinota egensiisino.
Kalaa Shittaye coyi`ranni; Biironsa widoonni kayinsanni chigginye dubbu owaantera ikkitannota qummeesse, kurino, giirate, mine mina`te, xaawulahonna Industirete hattono wayinna bushshu agarooshshira owaante uytannote yine bandoonnire ikkansa xawisino.
Kuri kaasate qixxaabbino chigginye xibbuunni 70% gobbate giddo mudhino chigginye ikkitanna, gattinoti kayinni Baara widi haqqe sircho ikkitinota kule; Alichaametenna halallitte baattora sumuu yitannore Leemmiicho, Waadde, Giraaweellanna wolootta karsinoonnita coyi`rino. Daanno agannira kaasate ikkitannota 65 miliyoone chigginyete sirchono xaanni qixxeessinoonnitano buuxisino.
Qoqqowu Irshunna Kalaqamu Jiro Biirora Kalaqamu Jironna Shiimmaaddu Gorsu Latishshi Dayrektoreete Dayrekterich Kalaa Bereket Aseffa isi widoonni; tayxe diro Biirote widoonni duucha horo afidhinotanna sagalete horora hossannota 39,621kg chigginyete sircho qixxeessate mixo amande, 38,912kg sircho qixxeessine woraddate chigginyete mereershubbara beenkoonni.
Konne diro sagaletenna wolootta duuchu dani horora hosannota 155 miliyoone ali chigginye kaasate kaayishsho qixxeessinoonnita coyi`rino. Kuri chigginyete dani gummaamma, leemma, saadate hayisso, buna, awukaadonna wolootta duuchu dani horo afidhino chigginye ikkanna; ikkado xeena ganiro sagalete horora hossanno chigginye 30 miliyoone ikkitannota kaasate wo`ma qixxaawo assinoonnita Kalaa Bereketi xawisino.
Chigginye kaasate ikkitannota 32 kumi heekitaare baatto bandonniha ikkanna; haammata balla umme chigginye kaasate qixxeessinoonnita kulino. Niri hawadira kaansoonni chigginye giddo xibbuunni 82% ikkitannoti muqaaqinota kalaa Berekete kule, dagano kaayinsoonnitanna konni gedenoonnni kaansanni chigginye uminsa gede assite awuuttanninna agartanni Qoqqowo haanju latishshi widira soorrate dilaalansa fula noonsata sokkasi saysino.
Bakkalcho Onkoleessa 17, 2015 M.D
