Amsaalu Felleqe
Addis Ababa:- Sidaamu Qoqqowira babbaxxitino basera iillitanni nooti Tiraafikete dano bidhachishshannota ikkase xawinsi. Qoqqowu Poolisete Komishiine Tiraafikete Dano Istaatiksenna Mashalaqqete Divizhiine Sooreessa ikkinohu Miseessu Inispekter Daanieel Sunkuura Itophiyu Pireesete Uurrinshara xawisino garinni; Qoqqowu giddo babbaxxitino qooxeessuwara mannu aana iillitanni nooti luphiima tiraafikete dano bidhachishshannota ikkase egensiisino.
Miseessu Inispekter Daanieeli xawishshi garinni; qoqqowoho quchummatenna baadiyyete tiraafikete dano bidhatto qarqarra yine bandoonniri mereerinni Hawaasi quchumira Addis Katamu sinu quchumira Industirete paarke qooxeessira haammata kiiro noonsa loosaasine millissannowa ikkasinni duucha yannara dano iillitanna mannunna jajju aana gawajjo iillitanni keeshshitino.
Iillitanni keeshshitino dano gargarateno Itophiyu Doogote Gashshootinna Hodhishshu Ministere ledo halamatenni gongo’mishamaano wiiggannokki gede kaa’litanno bireekere loosatenni dano ajisha dandiinoonni yiino. Hakkiinni sae Daaite geeshsha noo doogora bireekere loosatenni dano ajinshoonniha ikkirono; baxxinohunni Roori Hoteelenni- Tuulate-Morochu geeshsha noo doogo aana bireekere loosama hoogasenni xaano tiraafiikete dano bidhachishshanno qarqarto ikkase xawisino.
Sayinsummo lamalarano Onkoleessa 4/2015M.D Wolayitta Sooddotennni Hawaasira 44 manna hogowe daanni noohu koodde 3-02701 SD ikkino FSR kaameeli Lakkote quchumi gashshootira Morochoho ha’ra hasiissannosi doogo agure tayse sa’’atenni lekkaasinu aana aana dano iillishinoha ikkanna; konninni sasu manni lubbantinotanna jajjuno gawajjaminota qaagiissino.
Baxxinohunni qara qara doogga aana Tiraafikete dano batidhanno gede korkaata ikkitinori mereerinni doogga loosantino diizaynenna gongo’mishamaano mimmito balaxisiissanni sa’anno gede gadachishshanno malaatta dooggate qaccera qasama hooga; gongo’mishamaano oofate fajjinoonni bikki aleenni wiinamunni wiiggannokki gede kaa’litanno bireekere hasiissanno basera loosama hooga; wolu garinnino, gongo’mishamaanote wiiga qorqorranniti yannitte Raadaare hooga qarunni kullannire ikkitinota huwachishino.
Qara qara doogga aana gongo’mishamaanote wiiga ajinshanni bireekere loosate biilloonyi Itophiyu Dooggate Gashshootiha ikkasinni dano batidhanno qarqartora bireekere loosantanno gede hajo la’annonsa bissara egensiinsanni hee’noonnitano Miseessu Inispekter Daanieeli lede qummeessino.
Amandoonni 2015 baajeettete dirinni xaa geeshsha qoqqowoho babbaxxitino qooxeessuwara 187 tiraafikete dano iillitinoha ikkanna; kuri mereerinni 139 dano sa’u 6 aganna giddo calla iillitinote. Roorimankanni Hawaasi quchumira Addis Katamu sinu quchumira, Taaboori sinu quchumira, Tuulate, Shabbadiino, Daallenna Cuukkote tiraafikete dano batidhanno.
Wolootta qooxeessuwarano kiiro ajjinoha ikkirono dano kalaqantanota egensiisino. Sa’u lee aganna giddo calla reyo 86, kaajjado 43, shota 9 hattono jajju aana 1 xaphoomunni 139 tiraafikete dano iillitinoha ikkanna; reyote dano luphi yite iillase xaano lowonta bidhachishshannota ikkase huwachishino.
Qoqqowoho afantanno xaphooma gongo’mishamaano mereerinni ‘ISUZU’ kaameelinna xexxerrisu kiiro luphiima ikkase kulinohu Miseessu Inispekter Daanieeli; dooggate aana gongo’mishamaanote wiiga ajishshanno bireekere hasiisanno garinni loosama hooga; seerimale doogonni e’ino xexxerrisubba kiiro haammata ikka; oofate fajjo nookkiha oofa hatono oofaano fajjinoonnihu oofate bikki aleenni wiiga dano batidhanno gede assitanni afantannoha ikkanna roorenkanni xexxerrisunni iillitanno dano luphiima ikkaseno xawisino.
Mannunna jajju aana iillitannota tiraafikete dano ajishateno Qoqqowu deerrinni Tiraafikete handaarinni dagoomaho babbaxxitino doogganni horoonsi’ne huwanyoote kalaqate loonsanni hee’noonnita qaagiisse; roorenkanni oofaano, lekkaasinu, dagoomu hattono haja la’annonsa bissa hasiissanno qoropho assa noonsatano amadisiise sokkasi saysino.
Bakkalcho Onkoleessa 17, 2015 M.D
