Qiddist Gezaheny
Addis Ababa:- Hawadi yanna xeena harunsite kalaqantanno lolahunna baattote hoshooshamme danonni daga gawajjantannokki gede balaxote qixxaawo assinanni hee’noonnita Sidaamu Qoqqowi Danote Bidhatto Loosu Massago Komishiine egensiissu. Qoqqowoho lolahunna baattote hoshooshamme kalaqantanno yine bandoonni qooxeessubbara balaxote qorophishshi qixxaawo assinanni hee’noonnitano kulloonni.
Itophiyu Pireesete Uurrinshara bilbilunni xawisinohu Komishiinete Balaxote Qixxaawo Wiinamu Dawaro Dayirktoreete Dayirekterchi kalaa Yooseef Zewude; Qoqqowoho hawadi xeena harunsite lolahunna baattote hoshooshamme dano kalaqantanno yine bandoonni qooxeessubba roore anga Alichaamenna Gammoojjaame qooxeessubba ikkansa qummeesse; kuri mereerinni; Hawaasi quchuma lede Hawaasi Gaangaawi woradi, Lokka Abbaayyu, Morochu, Bilaatte Gaangaawinna Alatta Cuukkote woradda lolahu dano kalaqantanno yine bandoonni qooxeessubbaati.
Hattono Cirre, Bansi, Arooreessu, Daaeelu, Burru, Arbagooni, Gorcheenna Wondo gennetete woradda baattote hoshooshamme dano kalaqantara dandiitanno yine bandoonni qooxeessubba ikkansa Dayirekterchu lede xawisino. Konni albaanni kuri qooxeessubbara kalaqantino lolahunna baattote hoshooshamme danonni batinye kiiro noonsa daga darantinotanna jajju aanano gawajjo iillitinota kayisinohu kalaa Yooseefi; labbanno dano wirro kalaqantannokki gede xaa yannara tenne qooxeessubbara balaxote qorophishshi looso loonsanni hee’noonni yiino.
Xeenu korkaatinni kalaqamu dano kalaqantara dandiitanno yine bandoonni woraddara lolahu ha’ranno doogo fana lede lolahu kalaqamara dandaanno qooxeessubbara heedhanno daga kayisanna woleno balaxote qorophishshi aana huwanyo kalaqate looso hananfoonnita coyi’rannohu kalaa Yooseefi; tenne woraddara olluubbate afantanno latishshu loosaasinera qajeelsha uyineenna loossanni afantannota qummeessino.
Konninni ledote, maate shiimaadda oosora agarooshshe assanna baxxinohunni rosu mine hadhannonna higganno yannara shinqe haa’ra hasiissannota duu’re huwachishino. Baxxinohunni, baadiyyete qooxeessubbara maate qaaqquulleho qoropho assitanno gede qaagiissino. Laggate qooxeessubbara heedhanno dagano yannate geeshsha hatte basenni ka’’atenni kalaqantara dandiitanno danonni umonsa gatissanno gede Dayirekterchu sokkasi saysino.
Bakkalcho Onkoleessa 17, 2015 M.D
