Hawaasi Quchumira 8ki Kifile Fonqolamaanora Sidaamu Afii Fonqolo Di-uyinanni Yinanni Duduwi Kapho Ikkasi Xawinsi

 Abbebech Maatewoos

Addis Ababa:- Sidaamu qoqqowi Hawaasi quchumira 8ki kifile fonqolamaanora Sidaamu afii fonqolo di-uyinanni yinanni duduwi kapho ikkasi Qoqqowu Rosu Biiro egensiissu. Qoqqowu Rosu Biiro Laynki Sooreessinna Rosanna Rosiisate Handaari Massagaanchi kalaa Taaffese Gebiremaariyaa pireesete uurrinshara xawisino garinni; fonqolo uyinanni rosu danubba murtinoti Rosu Ministereeti. Konni daafira Afuu fonqolo /Sidaamu Afoo/ umi barra uyinannita egensiissino.

Kalaa Taaffese xawishshi garinni; tayixeha 8ki kifile fonqolu guma gobboomu deerrinni murrannihanna gumullanniha ikkasinni rosaano heewisamaano ikkite sa`anno gedenna fonqoloho qixxaabbanno gede baxxino illachinni loonsanni hee`noonni. Baalanti fonqolamaano rosu minna 8ki kifile aana guwurshu roso uyitanno gede assine massanganni hee`noonnitano coyi`rino.

Boode rosu minna umi wogganni hanaffe rosaanote guwurshu roso uyitanni nooha ikkirono; batinye rosu minna laynki rosu wogga Arfaasu aganinni hanaffe uurrinshu guwurshu rosi pirogiraame fushshidhe; baxxinohunni, rosaano fonqolo adhitanno rosu danubba aana Sanyotenni Qidaamete barri geeshsha rossanno gede assine guwurshu roso uyinanni afammannita xawisino.

Rosaano tiiunnino umonsa qixxeessitanno gede, maxaaffate mine horonsidhanno hattono yannansa doogimale huntannokki gede seejjatenni mittu mittunku rosu mini mixi`re loosanno gede assine loonsanni hee`noonnitano kalaa Taaffese qummeessino.

Ledoteno, tayxe 8ki kifile fonqolo fonqolantanno rosaano borreessamme konni albihu gede woraqatunni ikkikkinni onlayinetenniiti yaannohu Sooreessu; tenne tekinolooje horonsi’ne fonqolu gashshoote, fonqolu guma baala tenne websayitenni loosate sumuu yine loonsanni hoo`noonnita buuxisino.

Ikkinohura, rosaano onlayinetenni borreessantanni afantannoha ikkanna; xaa geeshsha 75 kume rosaano borreessantino. Babbaxxino korkaatinni borreessantinokki rosaano noohura borreessamme mitte lamala geeshsha suffannonoyee sooreessu lede xawisino. Amadisiiseno, qoqqowoho Hawaasi quchumira tayxe 8ki kifile fonqolamaanora Sidaamu Afii fonqolo diuynanni yinanni duduwi kapho ikkasi buuxisino. m Itophiyu

Bakkalcho Onkoleessa 17, 2015 M.D