Gaazeexu Odeessaanchinni
Addis Ababa:- Laynkiti ha’nura miinju haaroonso gumulo massagaanote mittimmanna qinaabbinota loosu harinsho xa’mitannota ikkase Mixotenna Latishshu Ministircho Dr Fitsum Aseffa xawissu. Ha’nuru miinji laynki fooliishsho mixo aana Ministir Dieetootu, uurrinshuwate sooreeyye, Dagate riqiwamaanonna Federeeshiinete amaale minna miilla afantinowa hasaawa assinoonni.
Mixotenna Latishshu Ministircho Dr Fitsum Aseffa; haaruudde xiiwo dandaanno miinja kalaqate ledonnita gobboomu miinju latishshinna Jireenyu gumulshi mixo hasiissannohura 2016– 2018M.D gumullanni laynki kalaqamu miinju woyyaambe qixxeessinoonnita xawissino.
Soorro nooseta shoole heellichonni mitte Maakro Ikkonoome kaajjishanna ga’labbisa ikkitanna; konne gumulsateno woyyaabbino jiro gamba assatenna gummaame mootimmate fulonna Investimentete gashshoote kalaqate mixo amaddino. Ledoteno, sufo nooha asalu gashshoote gumula, kaajjado woxu poolise halashshanna womaashshu handaari soorronna iillo gumulsa mixote giddo amandoonni.
Laynkiti soorrote heellicho Investimentetenna daddalu akata woyyeessa ikkinota xawissinoti Dr Fitsumi; konne gumulsateno woyyaabbinota dikkote iillonna heewisamaanchimma, lifixxinota loojistiksete owaante, baqqi yitinota shiimaaddanna manaadda Interpirayizooti handaara, isilancho gobbaydi Investimente goshooshate eo amaddinota qummi assitino. Dandoote latishshinna woyyaabbinoti mannu wolqa dikko heedhanno gede mixo amandoonnitano coyidhino.
Sayikki heellicho, handaarrate dhuka, laalchimmanna heewisamaanchimma lossate woyyaabbinota Gibirinnu laalchimmanna Investimente, woyyaabbinota minnatenna konistiraakshiinete Industire latishshanna Investimente aana illacha tugge loossanno. Hattono woyyaabbinota shiilote laalchimmanna investimente, gobbaydi daddalo lossa, Itophiyunnita dancha ayimma gatamara, daa’’ataanote iillo latishshinna Dijitaale miinji dhuka bowirsate aana illacha tungoonni.
Shoolki heellicho, mootimmanniha gumulate dhuka lossa; konnirano, ikkaddanna gummaamma Sivil Serviisete tantano kalaqa; baincho assoote hunatenni gummaamenna yannaasincho owaante aatenni; qinaabbinota Sivil Serviisete Dijitaalete taje amadooshshe gumulsate eo hee’ransa Ministircho kayissino.
Soorrote gumulshira massagaano latishshu womaashsha lossa; investimentete injiino akata kalaqa; dikko yannaasincho assa; laalchonna laalchimma lossa; owaante uynanni gara yannaasincho assatenni baincho assoote hunate murci’raanchimmatenni loosa agarantannota qummeessitino.
Laynki ha’nura miinji soorro gumulora massagaanote mittimmanna halama xa’mannota qummeessite; massagaano lede baalunku deerru deerrunku keeru sufora uminsa qeecha fulatenni miinju soorro gumulora jawaattanno gede woshshatto assitino.
Soorrote umi 12 aganna giddo miinju ga’labbo kalaqate loossannotanna 12-36 aganna geeshsha heewisamaanchimma bowirsa; hallanyu handaara kaajjisha gumulsinanni yine agarrannitano coyidhino. Seeda yannanni kayinni 10 diri mixonni amandoonni eo gumulsatenni kalqoomu deerrinni heewisamaancho miinja gatamarate uminsa qeechi hee’rannonsata Dr Fitsumi xawissino.
Bakkalcho Onkoleessa 17, 2015 M.D
