Abrahaam Saamueel
Addis Ababa:- Noonke qarrinni fulate kalaqote loosi aana illachiinshe giwirinnanke, Industirenna konistiraakishinete handaarra yannicha assatenni Itophiya latisa hasiissannota Xaphoomu Ministirchi Dr Abiy Ahimed xawisino. Xaphoomu Ministirichi Abiy; “Dandoo heewisamate” yitanno hedonni qixxeessinoonnita 3kita gobboomu deerri heewote battala faajjetenni fanni yannaraati tenne yiinohu.
Xaphoomu Ministirichi tenne yannra xawisino garinni; tini battala addi addi ikkadimmanna dandoo afidhino wedelli qarqarinsara kalaqote loosonsa amadde heewisamate shiqqannohonna qarrinsara woyyaabbino doogo hasidhanno yannaati. Konnira, noonke qarrinni fulate kalaqote loosinni giwirinna, industirrenna konstiraakishinete handaarra yannicha assine Itophiya latisa hasiissannota xawisino.
Mitte lamalara keeshshitannoti dandoote heewo, mimmitu ledo xaadooshshe kalqate, rosate, dikko hasi`ratenna noonke dandoo leellishate addintanni hasiissanno battala ikkitinota kulinohu Xaphoomu Ministirchi; Loosunna Dandoote Ministere uurritunkunni mittu diri yanna nafa heedhuserono, looso kalaqate dandoo afidhinorenna looso loosate dandiitanno wedella kalaqate dandiisiissanno doogo kalaqqanni nootanna hananfoonni loosi hexxo aannoha ikkasi coyi`rino.
Itophiyu haammatu qarri noo gobba ikkiturono, qarraho furchonna doogo kulannore shiqisha dandiitannota Dr Abiy Ahimedi qummeesse; ikkollana, konne uduunne hasi`nanni deerrinni laashshinanni hee`noonnikkitanna Itophiyu daga mine loosi`rate mite mite yannara kinna gobbanni eessitanni noo yiino.
Hasiissanno isilanchimma afidhino Imineberedete kinna laashshate dandiitanno gobba ikkite heedhenni, kayinni kalaqa dandiitannonna looso shotissanno ogeeyye boode ikkansanni kinna wole gobbanni eessinanni hee`noonnita xawise; konne gatisate dandoote heewo jawa qeecha afidhinota xawisino.
Kalaqo dagganno yannara rahotenni rosanna harunsa hasiissanno yiinohu Xaphoomu Ministirichi Dr Abiy; kalaqote ogeeyye kalaqantanno qarrubbanni fulate qarransa kalaqote loosinni tira hasiissannonsata coyi’rino.
Kalaqotenna tekinoolojete ogeeyye yannate qarrinni ruukkantukkinni gobbate gede noo qarrinni fulate kalaqote looso horoonsidhe giwirinna, industirenna konstiraakishete handaarinni xaa geeshsha la’noonnikki tekinolooje loosu giddora eessate loosa hasiissannota qaagiissino.
Itophiyu lophatenna soorramate dancha kaayyo noo gobba ikkitinota kule; kalaqote ogeeyye gumi addintanni kaa`lanno; qarra calla hasaanbeemmoha ikkiro qarru giddonni fullannikki daafira qarru giddonni hiitto ikkine fula noonke yaannoha gutunni hasaawanna halama hasiissannonke yiino.
Loosunna Dandoote Ministeere Ministercho Dukko Muferiyaati Kaamili ise widoonni; gobboomunniti dandoote heewo handaari, uynoonniha miinja heewisamaancho assanno; hegeraamo latishsha abbanno; konne looso gumu nooha assate jawu dhuki noosita xawissino.
Ministercho, harinsanni hee`noonniti gobboomu dandoote heewo deerru deerunkunni noo Kolleejjenni, quchumu gashshootinni, qoqqowu deerrinni heewo harinsanni keeshshine sase dirima sai gedensaanni qeeltanni daggino heewisamaano gobbate deerrinni fillanniwaati. Heewote harinsho jawa kakkaooshshenna haaro hornyuwa kalaqate qarra tirtanno egenno, tekinoloojenna laashshinoonni laalcho fushshate dandiisiisannoho yitino.
Tekiniiketenna ogeeyyete qajeelshi uurrinsha laashshinanni tekinoloojete Interprizooti fultanno baycho ikkanno gede dandiisiissanno millimillo hananfoonni. Konninni, hexxo aanno gumi leella hanaffinota Dukko Muferiyaati coydhino.Loosunna Dandoote Ministerennii qixxaabbinoti shoolu barrira keeshshitannoti dandoote heewo laalino uduunne xaadinsanni battala ikkitinota qummeessinoonni.
Bakkalcho Onkoleessa 17, 2015 M.D
