Gaazeexu Odeessaanchinni
Addis Ababa:- Quchumma latisatenna teessaanote heeshshora injiitinota assate illacha tunge loonsanni hee’noonnita Sidaamu Qoqqowu Quchumu Latishinna Konistiraakishiinete Biiro egensiissu. Quchumma yannitte, invesitimeentetenna turizimete doodhinannita assate illachinshoonnitano xawinsoonni.
Tenne xawinsoonnihu Biiro 2015 baajeettete diri 9 agani loosu gumulo keeno tenne lamalara Alatti Wondi Quchumira Harissu yannaraati. Barete aana Qoqqowoho afantanno quchumma yannitte, invesitimeentetenna turizimete doodhinannita assate illachinshe loonsanni hee’noonnita Biirote sooreessi Kalaa Mekuriya Marshaye xawisino.
Quchumma hasiissanno deerrinni co’ichanna biifado assa; addi addi safote latishshi shiqisho wonsha; investimeentetenna mi’nine hee’nanni base shiqisha; quchumma pilaanetenni massagantanno assatenna labbanno handaarranni loosamino loosi dancha ikkasi sooreessu coyi’rino. Aantete wo’mante handaarranni quchumma hendoonni deerri widira reekkate mootimma assitanno irkonna harunso aana dagate beeqqo gotti assatenni quchumma latisatenna teessaanote heeshshora injiinotinota assa hasiissannota xawisino.
Quchummate safote latishshubba; caabbichu, doogga, bilbilu owaante, xalalu anganni way shiqishonna labbeemmere ikkansa qummeessinohu Kalaa Mekuriya; kuri widoonni dagatewiinni ka’anno xa’muwara dawaro qolate loonsanni hee’noonni loossara woyyaambe heedhurono qoqqowu mootimma Federaaletenni ledo halante loosanno loossara ledote quchummanna woradda noonsaha albisa qeechansa fultanno gede amadisiise sokka saysino.
Maazagaajju aanno owaante widoonni leeltanno foonqe tirateno balanxe 7 quchummate gashshootira haaro tekinoloojenni irkisantino owaante aatenninna illacha tunge loosatenni lexxitanni dagginoti dagate hasattora tumo qolate hajamaano mereersitino owaante aate xaphoomunni 71 qoqqowoho afantanno maazagaajjunni tantanante galtanno quchumma widira qolle halashshate looso loosate lallawu, wodhonna biddissu qixxaawe gumulamanni nooha ikkasinni muli yannara Amaalete minira shiqe kaajje loosu aana hosanno yine agarannitano kulloonni.
Bakkalcho Onkoleessa 10, 2015 M.D
