Qiddist Gezaheny
Addis Ababa:- Baajeetete dirinni jajjabba loossa loosatenni gobbaydi loosu bobbaaso wo’munni wo’ma Tekinoloojetenni massagantannotanna galtannota assa dandiinoonni yitino; Loosunna Dandoote Ministircho Muferiyat Kaamili.
Loosunna dandoote ministircho dukko Muferiyat Kaamil baxxinohunni Itophiyu Pireesete Uurrinshara xawissino garinni; gobbaydi gobbuwa loosu bobbaaso yannaasincho assate loosaasine calla ikkitukkinni mannu wolqa bobbaasate looso yannaasincho assatenna garunni gashshate dandiisiisannore tekinoloojetenni massagantinore jajjabba loossa baajeettete dirinni gumulloonni.
19 haaruudde loosu amanyootta kalanqe 12 jeefinse loosu giddora e’noommo yitinnoti Ministircho; baxxinohunni gobbayidi loosu bobbaaso wo’munni wo’ma Teknoloojetenni massagantannotanna galtannoha assate dandiinoonni. Kunino qansootu hobbaate agarsiisate wiinamu akata kalaqinoho yitino.
Konni garinni tini hayyo xawado ikkinohu tajete amanyooti hee’ranno gede assitinnota qummeessite; mittu looso hasi’rannohu mamiinni kae hiikka iillino?, hiittoo akati aana afamanno? Yaannoha harunsate dandiisiisannota ikkaseno xawissino. Dukko Muferiyaati xawissino garinni; gatinohuno deerru deerrunkunni loosu giddora eanno. Harinsho xawisatennino qansootu horaameeyye ikkansanni woyyaawino deerra iilla dandiitanno gede assinanni.
Yannaasincho loosu bobbaaso horonsira dagate seeriweelo doyicho ledo amadisiisaminohunni noo hajubba ruukkitanni dagganno gede kaa’litanno yitinnoti Ministircho; hananfoonnihu haaroonsote loosi baalanko xawo ikkasinni ikkadimmanna hasatto nooe yaannohu looso hasi’ranno baali bobbaha dandaanno yitino. Tini harinsho loosu akati garinni babbaxxino bikkaanchi hee’rasera dandaanno; hattono Tekinolooje gobbaydi loosu bobbaasora calla ikkikkinni gobbate giddo heedhanno loosu bobbaasora owaante uyitanni afantannota ikkaseno xawissino.
Tekinolooje giddose keeshshinoha hasiisannokki xaadooshshenna horote mittoo’ma suude amadisiisate kaa’litinno yitinnoti Ministircho; konni albaanni handaaru mussinnaho reqeccaawinoho; xa kayinni diriirsinoonni tekinolooje konnenna woleno togoo qarrubba gatisate kaa’litanno; gumano albillitte roorenkanni keennanni ha’neemmo yitino. “Owaante hasidhe dagganno hajamaano tultaawa ajishate widoonni jawa horo nooseta buunxoommo. Harancho yanna giddo danchu gumi leellino” yitino.
Ministircho xawishshisenni; mittu looso hasi’ranno manchi borreessame looso hasi’rannoha ikkasi xawisannoha ayimmate xawishsha amade looso hanafate dandiisiisannosiha woxu kaa’looshshe hasi’riro hajo la’annonsa bissa ledo xaadooshshe kalaqanno gede kaa’lannosi. Hiittoo loosi mama no? looso hasidhannorina mama no? Yaannoha bande looso hasidhannore loosu ledo xaadisatenni qarraho tiro aanno amanyoote ikke owaatanni afamanno.
Lamalate jeefora Xaphoomu ministirchi Dr Abiy Ahimed Loosunna dandoote ministerenni latte loosu aana hossinota gobbayidi loosu bobbaaso taje amanyoote towaati yannara xawisanni; “Amanyootu qansootunniha tajete amadooshshe yannaasincho assatenni qansootu aana iillanno qarra gatisatenna gobbaydi gobbuwa loosu bobbaaso aana noo foonqe wonshate widoonni hee’ranno qeechi luphiimaho” yinoti qaangannite.
Bakkalcho Onkoleessa 10, 2015 M.D
