Abbebech Maatewoos
Addis Ababa:- Rosu minnaha deerra woyyeessate illachishshino gobboomu millimillo harinsannita Rosu Ministere egensiissu. Gobboomu rosu keeno gumanna umiha 1ki deerri rosi isilanchimmanna xiinxallote gumi aana illachishshino amaalammete bare tenne lamalara Iskay Layiti Hoteelera harinsoonni.
Hasaawu aana Rosu ministirichi Piroofeeser Birhaanu Negga xawisino garinni; rosantino harinshonni hodhatenni rosu islanchimma aana wodanchinanni qarrubba seejji`ranna gobbate gede worroonnita gawalo seekki`ra dandiinannikkihura haaruudde laooshshubba hasiissanno.
Lawishshaho, doorre xiinxallo harinsoonni qooxeessubbara rosu isilanchimma aana yaachishanno coy leellinota coyi`rinohu Piroofeeser Birhaanu; albillicho Itophiya ragidhanno ilama daafira yine xiinxallote garinni woyyeessate looso gumullannitano buuxisino.
Rosu akata soorrate adhinanni qaafubbara caakko uyino yiinohu Piroofeeser Birhaanu; rosaanote gumi woffi yiinoha ikkasira qarunnni maatete harunso anje; rosaanonna rosiisaano rosu battalanni gata; rosiisaanotenna rosu mirrooti dhuki anje leellitannota kaysino. Rosu yanna garunni horonsi`ra hooga, rosaanote rosate hasatto ajate akatino leellinota kule; hasiissannori wo`mitinonsakki rosu minna rosu isilanchimma aana xiiwo ikkannonsa yiino.
Way, shumate mini noonsakki rosu minna seennu rosira qarrisannonna rosaano roso adhate dhukansa ajishatenni hasi`nanni guma afi`nannikki gede xiiwo gashshannotano xawisino. Gobboomu deerrinni afantanno 49 kume meddi yitanno rosu minna xintu latishshi aana assinoonni xiinxallubbanni xibbuunni 99% ikkitannori rosoho qixxaabbinore ikkitinokkita bandoonnitano buuxisino.
Rosu minnaha deerra woyyeessate illachishshino gobboomu millimillo mittu agani gedensaanni hananfannitano Pirofeeser Birhaanu kule; hananfanni millimillo rosaano, rosiisaano, albi rosaanonna dagooma qineessatenni rosu minna rosatenna rosiisate harinshora injitannore assate loonsannita xawisino.
Harinshote maateno annimmate macciishshammenni millissanno gede assitannota, rosaanonniha kalqoomu heewisamaanchimma agarsiisate kaa`litannotano kaysino. Dhukunna gashshootu ledo amadisiisamino qarra tirate rosu murrooti qajeeltanno uurrinsha uurrinsanni afammannitano buuxisino.
Xiinxallo shiqishinohu Rosu keenonna fonqolu owaante laynki qara dayirekiterchi Kalaa Yiliqaal Wondimmeenehi; xiinxallo 2014M.D harinsoonnita coyi`rino. 4kinna 8ki hattono balaxote balaxote rosi deerri aana xiinxallinoonnita, wonsha hasiissannonsa gede worroonni bikkaanonna gawalote ragaanni gumu xibbuunni 50% woro leellishinotano buuxisino.
Ga`labbote korkaatinni ea dandiitinokkiri gobbaanni xiinxallo gobboomu deerrinni hadhinota xawisatennino; isilanchimmate aana illachisha hasiissanno gede leellishshinota ikkase coyi`rino. Xiinxallotenni kifillate deerrinni 16 kume iillitanno rosaano xiinxallote aana beeqqtinotano Kalaa Yiliqaal lede xawisino.
Bakkalcho Onkoleessa 10, 2015 M.D
