Amsaalu Felleqe
Addis Ababa:– Konni albaanni rumuxxe keeshshinohu baajeette cunfanni yannara noo jiro hafanfarsatena doogimale horoonsi’rate assooti qoqqowoho sa’u sase dirra kawa nookkitanna hidhotenna jajju gashshooti lallawi garinni calla massangannita
Sidaamu qoqqowi Fayinaansete biiro Qoqqowu Womaashshu Biiro egensiissu Sidaamu qoqqowira womaashshu gashshooti amanyoote woyyeessatenni baajeette fulo massagganno gede assa dandiinoonnita Qoqqowu Womaashshu Biiro egensiissi Dr.araarso Gerremew xawisino
Qoqqowu Womaashshu Biiro Sooreessi Dr Araarso Gerremew Itophiyu Pireesete Uurrinshara xawisino garinni; Gobboomu deerrinni harinsanni hee’noonni soorro gummaamenna suffinota assate; hattono latishshunna danchu gashshooti loossa kaajjishatenni Qoqqowinke lophono buuxisate Womaashshu gashshooti handaarinni jawaata loossa gumullanni hee’noonni.
Konnirano, qoqqowunna woraddate mootimmate womaashshu gashshootenna hidhote harinsho onlaynete tekinolooje hayyo widira reekkanna aananno dirinnino mootimmate elekitiroonikisete hidhora kaima ikkitanno loossa loonsanni hee’noonnita qummessino.
Qoqqowu mootimma baajeette qixxeessanna fajjinoonni baajeette hasiissanno hajora baata; baajeette horoonsi’nanni gara woyyeessanna garunni gashsha; hattono fulo ikkitino jiro keenanna qorqora; baajeettete shallago baatooshshe qorqorranni hayyo diriirsa qara qara loossa ikkitanna; konni kaiminni tayxeehu baajeettete diri giddo loosante goofa hasiissanno pirojekituwa gooffe dagoomaho horo uytanno gede illachinshe loonsanni dangoonnita xawisino.
Baajeettete diri goofimarchira gattino yanna giddo mixotenni safantinokkiti womaashshu fulo heedhannokki gede assate qixxaawo assinoonni. Kaapitaale pirojekituwano ikkituro Biirotenni afamishsha uynoonnirinna loosante gooffinorira calla baatooshshe gumullanniha ikkanna;baajeette horoonsi’rate yine loosante gooffinokki pirojekituwara kachaachamme baantanni harinsho heedhannokkitano Dr Araarso qummeessino.
Baajeette garunninna hasiissanno illachuwara horoonsi’rate dandiinanni garinni kaapitaale pirojekituwa massagganno uurrinshuwarano huwanyoote kalaqatenni sumimmete iillinoonnitano hattonni. Jiro garunni gashshatenna hasiisanno illachira calla horoonsi’rateno mootimmate womaashshu gashshootinna qorqorshu hayyo yannitte assatenni womaashshu gashshooti ragaanni qaddo ikkino qoqqowo assate loonsanni hee’noonnitano kulino.
Qoqqowoho womaashshu gashshooti hayyo woyyeessatenni xaa yannara fulo baajeette massaggannokki gede assatenni baajeette fulo massagganno gede assa dandiinoonni. Konninni, baajeette fulo massagganno gede assatenni jiro mixotenni massaga dandiinoonni yiinohu Sooreessu; loossano ikko jiro mixote garinni calla gumulantanni noota xawisino. Xaa geeshsha noo harinshonni Sidaamu qoqqowira baajeette fulo massagganno amanyoote diriirsinoonnita buunxoonni yaanniiti Biirote sooreessi Dr Araarso lede xawisinohu.
Bakkalcho Onkoleessa 10, 2015 M.D
