Gaazeexu Odeessaanchinni
Addis Ababa:- Sidaamu qoqqowira mussinnu jaddonni kassasantinori 136 massagaanonna ogeeyye 11 diri geeshsha ikkanno kotoottote usurinni qorichishantanno gede gumullo saysinota Qoqqowu Xaphoomu Seeru Allaalshi egensiisi. Awaawuraminoha 60 miliyoone ale mootimmatenna dagate woxeno qolsiisa dandiinoonnitano xawinsoonni.
Sidaamu qoqqowi Xaphoomu Seeru Allaalshi Qaru xaphishshu seeru allaalshi Mato Maaru tenne lamalara uyno xawishshinni; mussinnunna bainchu assooti latishshunna danchu gashshooti qarra ikke sufannokki gede loonsanni hee’noonni.
Mootimma wortino faasho garinnino qoqqowoho Tseremussinnu komite tantanneenna assitino millimmonni guma abba dandiitino loossa loonsanni hee’noonnitano xawisino. Tantanantino komite, mussinnu jaddo badatenninna buuxatenni xaphoomunni 118 qummeessa dagatewiinni gamba assa dandiitino yiino; kalaa Mato Maaru.
Qummeessuno, Eote, Womaashshu, Minnate gashshooti, Investimentete owaante hattono baattote gashshooti handaarinni ledo amadisiisaminohunni mussinnunna bainchu assootubba loosantinota leellishshanno yiino kalaa Mato. Tsere mussinnu komite 265 kissete mazigabbanni kisse hanaffinota xawise; kuri mereerinni 72 mazigabba yoote mine gumulo afidhinota xawishshisinni egensiisino.
Qoqqowo loosantinota mussinnunna bainchu assooti hajo buuxate harinshonni 505 loosu massagaanonna ogeeyye seerunni xa’mantanno gede bandoonniri mereerinni xaa geeshsha 136 ikkitannori aana 1 dirinni kayse 11 diri kotoottote usurinni qorichishantanno gede gumulo uynoonnita xawisino.
Usuru qorichira ledote, sa’u sase aganna giddo xaphoomunni 60 miliyoone birri ale awaawuraminoha dagatenna mootimmate jiro qoltanno gede assinoonnitano xawisino. Baxxinohunni Hawaasa, Yirgaalamete, Lakkotenna Hookko quchummara seerimale ikkitino doogonni hallanyootaho saynsoonnita 5 hekitaare ale baatto qolsiisate dandiinoonnita qaagiissinohu kalaa Mato; tseremussinna gargarate milimillonni qoqqowoho woyyaawino gumi leellanni noota qummeessino.
‘’Seerimale rosu tajubba qixxeessatenni horoonsi’ra lainohunni iillino qummeessi kaiminni loosoho qaxaratenna basete soorro uurrisa dandiinoonni’’ yiino. Xaa yannara 193 mazigabbanni gattinori 369 massagaanonna ogeeyye kissete hajo la’’antanni noota xawisino.
Dagoomuno, mussinnu jaddo gobbatenna dagate aana iillishshanno gawajjo huwatatenni togoo assootubbanna qarra annimmatenni gargarate fulanni noo qeecha naade; albillichono sharro kaajjishe sufanno gede xa’mino.
Mussinnu jaddo iillishshanno gawajjo huwatatenni qummeessa uytino bissarano seerunni agarooshshe assinoonninsa daafira iillitinonsa hekkonna gawajjo nookkitano qummeessino. Usuru qorichi gumulo saynsoonnisari Qoqqowoho, woraddatenna quchummate gashshooti deerrinni noo loosu massagaanonna ogeeyye ikkansano xawisino.
Bakkalcho Onkoleessa 10, 2015 M.D
