Abbebech Maatewoos
Addis Ababa:- Tigrayete qoqqowira 1 kume 218 rosu minnira uurrinshu rosatenna rosiisate harinsho hanaffinota xawinsi. Tigrayete dotteessa 23nni hanafe 1 kume 218 rosu minnara rosatenna rosiisate harinsho hanaffinota qoqqowu rosu biiro sooreessi Kiiros Gu-uush (Dr) xawisino.
Biirote sooreessi I.P.U xawisino garinni; qoqqowoho afantanno 1 kume 466 rosu minna mereerinni 1 kume 218 rosu minna aana dotteessa 23nni hanafe uurrinshu rosatenna rosiisate harinsho hananfoonni. Rosu hanafasinni rosaanotenna rosiisaanote mereero quqquxxonna rosu goo`ne wodanchinoonnita xawisatenni; kunino rosu dagoomi giddo luphiima hagiirre kalaqinota xawisino.
Baalanti rosu minna mitteenni hanafa dandiitinokkitano coyi`rinohu sooreessu; rosatenna rosiisate harinshora kaa`litanno uduunnubba babbaxxino korkaatinni billaallite keeshshansa batinye rosu minnara yannatenni roso hanafisiisate mitiimma ikkinota uuxisino.
Yannate geeshshi gashshaanchinna rosu biiro gutunni ikkatenni qoqqowo gatisate rosu handaara xagisate balaxo aatenni millissanni afantannono yino. Batinye rosu minna babbaxxino bayichinni daggino daramaano caa`late horonsidhannohuranna wolootta rosu minnano olu korkaatinni olu bagadda giddonsa worroonnihura co`ishshu looso loonsanni hee`noonnitano sooreessu xawisino.
Rosu ministere komunikeeshiinete hajubba loosu gumulsiisaancho Dukko Amelewerq Hizqieel ise widoonni; muli yanna gidoo rosu ministerenna babbaxxitino bissanni doorantinoti ogeeyyete gaamo Tigraye hodhite roso hanafa dandiinanni harinsho aana hasaawa assitino yitino.
Gaamo yannate geeshshi gashshaanchinna Tigrayete rosu biiro ledo qoqqowu rosu handaari ragaanni gumaamo hasaawa assitinota coyidhioti loosu gumulsiisaancho konni garinnino ikkado qixxaawo assinanni keeshshinihu gedensaanni sa`u lamalanni hanafe rosu hanafinota coyi`dhino.
Hananfoonniti rosatenna rosiisate harinsho kaajjite suffanno gede rosaanote hurbaati hanafanno doogo injeessinanni yitinoti loosu gumulsiisaancho; konni garinnino hurbaate gumulate dureeyyete ledo hasaawatenni umi deerri rosu minira hurbaatu hanafannota coyidhino.
Tigraye sonkoonni gaamo konni assootira hossanno jiro gamba assate ragaanni yannate geeshshi gashshaanchi ledo ikkatenni loossanni afantannotanna muli yanna giddo konne lainohunni mashalaqqe uyitannota Dukko Amelewerq buuxissino.
Bakkalcho Onkoleessa 3, 2015 M.D
