Addis Ababa:- Fayda dijitaale ayimmate badooshshi qansootunna owaante uytanno uurrinshubba mereero ammanamooshshe kaajjishatenni miinju xaadooshshe kaajjishannoha ikkasi Fayda Dijitaale Ayimmate Badooshshi Pirogiraame egensiissu.
Pirogiraamete Loosu Gumulsiisaanchi Yodaahe Ariayasillaase Fayda dijitaale ayimmate badooshshe lainohunni amma’note uurrinshuwa massagaanora hedo cu’mishiishate bare Sheraateni Hoteelera harinsi yannara coyi’ranni; Fayda dijitaale ayimmate badooshshi qansootunna owaante uytanno uurrinshubba mereero ammanama kalaqatenni miinju xaadooshsheno kaajjishatenna dijitaale miinja kalaqate dandiisiisanno.
Kuni ayimmate badooshshi lifixa dikkote owaante afi’rate, meessi taje agarsiisi’ratenna hobbatu ledo xaaddanno qarrubba tirateno ledote dijitaale Itophiya kalaqate jawa qeecha afi’rinota kaysino.
Fayda dijitaale ayimmate badooshshe xaa geeshsha 10 miliyoone qansootira iillisha dandiinoonniha ikkirono; mixote garinni kayinni hasi’noonni deerrira iillinokkita qummeesse; konnira korkaatu, dagoomu giddo huwanyotu xe’nenna so’rote laooshshe ikkasi coyi’rino.
Fayda ayimmate badooshshi qansootaho duuchu handaari horo aannota huwatatenni horaameyye ikka hasiissannota xawisinohu kalaa Yodaahe; konni kaiminni, baalunku qansooti horaameeyye ikkanno gede huwanyoote kalaqate ragaanni amma’note annuwi qeechi luphiima ikkasi huwachishino.
Itophiyu amma’note uurrinshubba songo xaphishshu borreessaanchi Qesiisi Taagay Taaddele Isi widoonni; Fayda dijitaale ayimmate badooshshi dagoomu mimmitu ledo ammanamooshshe kaajjishannoha ikkasi coyi’rino. Dijitaale ayimmate badooshshe amma’note ledo gurcho assannori nookkitano huwachishino.
Fayda dijitaale ayimmate badooshshi dagoomu giddo hasi’noonni garinni iilla dandaa hoogasira korkaatu huwanyootu anje noohura ikkasi kule; amma’note annuwi dagoomu giddo lawishsha ikkansanni sayissanno sokka garinni huwanyoote lossi’ne Fayda horaameeyye ikka hasiissannotano sokkasi saysino.
Fayda ayimmate badooshshi gobboomu latishsha lossate, awaawurrenna jaddo gargarate hattono lifixa owaante afi’rate kaa’lannota qummeesse; amma’note annuwino dagooma rosiisatenni yawonsa fula noonsata; dagoomuno tenne owaante horaameeyye ikka hasiissannonsata huwachishino.
Barete Itophiyu Isilimunni hajubba pirezidaantichanna amma’note uurrinshuwa aliidi agaraanchi Sheeh Haaji Ibrahiim Tufa, Itophiyu amma’note uurrinshuwa songo gambisaanchi Bitsui Abune Gorgoriyoosi, Keeru ministere minister Dieetichi Cherugeeta Genne lede amma’note uurrinshuwa luphiima massagaano annuwi beeqqitino.
Amsaalu Felleqe
Bakkalcho Bocaasa 19, 2017 M.D
