Addis Ababa:- 2017 baajeettete dirinni shoole aganna giddo 150 kume ali toone bunu laalcho gobbaydi gobbuwara sonkoonnita Itophiyu bununna shaete biilloonyi egensiisi. Shoole aganna giddo gobbaydira sonkoonni bunu laalchinni 674.55 miliyoone doolaare eo afi`noonnita buuxinsoonni.
Biilloonyu dagate xaadooshshinna komunikeeshinete loosi gumulsiisaanchi Sahilemariyam Gebiremedihin IPUra xawisino garinni; baajeettete dirinni shoole aganna giddo 98 kume 999 toone buna soyaate mixi`ne; 150 kume 346 toone buna babbaxxitino gobbuwara soyaatenni mixote aleenni gumulsha borreessiisa dandiinoonni.
Shoolu aganinni 531.4 miliyoone doolaare eo afirate mixi`ne; 674.55 miliyoone doolaare afi`noonni yiino.
Gumulshu sa“i baajeettete diri yanna ledo heewisiinsanni woyte bikkunni 62 kume 587 toone; eotenni 226.89 miliyoone Ameeriku doolaare lexxo borreessinoonni yiino.
Itophiyu bunu gobbaydi dikkora 10 qara qara iillote gobbuwa hee`ransa xawise; Jermen, Saudi Arebiyunna Beljiyeme Itophiyunniha buna laalcho hidhatenni bikkunnino afisiissino eonnino uminni sayikki geeshsha deerru aana ofoltino.
Ameeriku, Wodiidi Kooriyi, Jaappaane, Halantino Arawete Emireete, Jordaan, Xaaliyunna Awustiraliyu 4ki-10ki deerri geeshsha ikkansa egensiisino.
Iillote gobbuwara 2016 gumulshi ledo heewisiinsiro bikkunni 84 anga xibbuunni; eotenni la`niro 60 anga xibbuunni lexxo noosi yiino.
Xaphooma bajeettete dirinni shoole aganna giddo 157 kume 257.98 toone bunu, shaetenna makimaanote laalcho babbaxxitino gobbuwara soyaatenni 678.33 miliyoone Ameeriku doolaare eo afi`noonnita huwachishino.
Gumulshu sa“i baajeettete diri yanna ledo heewisiinsiro bikkunni 72 anga xibbuunni eotenni qole 50 anga xibbuunni lexxo borreessinoonnita buuxisino.
Abbebech Maatewoos
Bakkalcho Bocaasa 19, 2017 M.D
