Abrahaam Saamueel
Itophiyu Pireesete Uurrinsha qixxeessitannoti editoriyaalete battala kaajjite sufa noota xawinsoonni. Itophiyu Pireesete Uurrinsha qixxeessite shiqishshannoti editoriyaalete battala foremera Dagate Riqiwamaano Amaale Mini Miilla, Addisi Ababu Yuniveriste rosiisaano, babbaxitino miidiyu bissa sooreeyye, odeessaanonna Itophiyu Pireesete Uurrinsha editoriyaale afantinowa harinsoonni.
Battalate konni albaanni loonsoonni xiinxallonna barraho shiqqino xiinxallo ledo qoleno 14ki maxaafano elektirooniksetenni maassiinsoonni. Qoleno Itophiyu Pireese Uurrinsha attantinota 14 maxaafu dana hanqaffe amaddino appilikeeshiineno maasiinsoonni.
Dagate Riqiwamaano Amaale Mini Dimokiraasete Hajubba Uurrinshu Komite Gambisaanchi Kalaa Iwunetu Aallenehu battalate coy`ranni, IPU uurrinsha hala`lado ikkinoha haaroonsate looso loossanni afantanno. “Itophiyu daafira” yaanno uminni dagoomu baxanno pifrograame babbaxitino battalara harisanni noo uurrinshaati; xa kayinni haammata soorrote loossa mereero mitto ikkinoha editoriyaalete battala qixxeessansa albillichono loonsanni loosira woyyaawinoricho kalaqate qoodsi jawaho yiino.
IPU, wolootu uurrinshara gadesi konni garinni beeha galantannisiha ikkinota kulinohu Iwunetu, gobbate gede dagganno ilama busulsiisatenna ikkadda assate dandaa noonke; konnirai, babbaxitino uurrinshara noo editoriyaale mimmitu ledo rosate tenne gedeeti gutu battala kaajjite sufa noose. Konnirano Itophiyu Pireesete Uurrinsha Uurrinshu Komite su`minni galateemmo yiino.
Itophiyu Pireesete Uurrinsha Loosu Massagote Boorde miila ikkinohu Kaa`laanchu Piroofeserchi Mekuriya Mekaashihu isi widoonni; tini battala haammattu rosichi noote; mitte uurrinsha giddo loonsoonni xiinxallo woleho iillisha hooga googidete giddo noo caabbichi gede ikkanno. IPU konne sae techo xiinxallo lendanna xaa geeshsha attansiisinota maxaaffa onilaayinete dagoomaho iillanno gede assatenni woleho lawishsha ikkino yiino.
“Pireese soorrote aana no; konni albaanni uurrinshate loosu massagaano boorde giddo loose saoommo; hakkawoyte uurrinsha noo daninna xa noo soorro maalallannite. Tini jawa soorrooti; tenne soorro albillicho lende harisate baalunku qoodasi fula noosi; loonsanni loossarano dhuku fajji garinni qote halashshine duqqa hasiissanno” yiino.
Itophiyu Pireesete Uurrinsha Qaru Loosu Gumulsiisaanchu Kalaa Geetinnet Taaddesehu, uurrinsha konne editoriyaalete battala umise ogeeyyenni qixxeessitanni umise editoriyaalera loosu woyyawara horoonsidhanni keeshshinota egensiisino.
Konne dancha roso adhinanni battala baalaho iillado assate, shiqqanno xiinxallo roorenkanni kaajjado suffanno gede assate wolootu miidiyu massagaanonna ogeeyye beeqqitanno gede, xiinxallo shiqishate kayinni Addisi Ababu Yuniversite rosiisaano beeqqitanno gede assinoonnita Kalaa Geetinnet Taaddesehu coy`rino. Itophiyu Pireesete Uurrinsha xaa geeshsha gobabate jawa qeecha afidhinota 13 maxaaffa qixxeesse attansiisinota xawisinohu Qaru Loosi Gumulsiisaanchu, techo maxaafi 14kiha ikke attamaminota xawisino.
Attammanni waagi lexxa uurrinshate loosi aana jawa jifo ikkinota kulinohu Kalaa Geetinnet, Itopiyu Pireesete Uurrinsha xaa geeshsha attansiisino maxaaffa onilaaynet iillado assate “Ethiopian Press Agency Ebooks” yinanni apilikeeshine kalaqe baalanka maxaaffa nabbawaanote iillado assinoonnita egensiisino.
Bakkalcho Onkoleessa 3, 2015 M.D
