Addis Ababa:- Sa`u lee dirrara Itophiyu miinji mereerimunni 7.2 xibbuunni lophasinna 10 biliyoone doolaare gobbaydi asale baantoonnita pilaanetenna latishshu ministere egensiissu. Woyyeesso miinju lopho sufisiisate dandiissannotano buuxissino.
Pilaanetenna ltishshu ministircho Fitsum Aseffa (D/r) ministerete loosu mini gobboomu mixubbanna gumulshubba lainohunni hajo la`annonsa bissa ledo sa`u lamalara hasaawa assini yannara xawissino garinni; gobboomu soorro kawa Itophiyu miinju amanyooti piragimaatik kapitalizime widira tareessanni no. Sa`u lee dirrara Itophiyu miinji mereerimunni 7.2 xibbuunni lophino. 10 biliyoone doolaare gobbaydi asale baantoonnino yitino.
Itophiyu miinji sa`u lee dirrara mereerimunni 7.2 xibbuunni lophasi kayisse; miinju woyyeesso miinju lopho sufisiisate dandiissannotano xawissino.
Itophiyu gibrinnu, industirete, shiilo, turizimenna dijitaalete miinji aana illachishshino miinju poolise gumulanni afammannitano hattonni.
Kaajjado miinja kalaqi`rate miinju tantanote reekko hasiissanno yitinoti Fitsum (D/r); woyyino uurrinshanna kalaqamu jiro noose gobba gummaamo miinju tantanote reekko abba noose yitino. Tantanote miinju reekko mitte gobbara qara ikkitinota buuxisse; laashshaano industirra tekinolojete roorrimmanni, rosino mannu wolqanni irkisa sufote tantanote miinju reekkora qara ikkitinota coyidhino.
Gobboomu soorro kawa Itophiyu miinju amanyoote piragimaatik kaapitalizime widira tareessanni no yitinoti ministircho; sa`u lee dirrara 10 biliyoone doolaare gobbaydi asale baantoonnita xawissino.
Gobboomu soorro kawa gumulote aana afantannoti miinju poolise yanna, akatubbanna daga hedote giddo wortinota ikkase buuxise; ha`nura miinju woyyeessono hallanyu handaari investimente jawaachishshannota, jajjabba handaarra aana mootimmate beeqqo leeltannota ikkase coyidhino.
Soorrote mootimma sufotenni gobboomu lopho ollahisate dandiissanno miinju woyyeessubba assitinota xawisse; ikkado mannu wolqa kalaqatenni, ikkado inerje shiqishatenni, gibrinna yannoonsatenni, pirojekitubba jeefisate dhuka kaajjishatenni, shiilotenna laashshaano indusire handaara lossatenni, dijitaalete miinjinni, xintu latishshinni, turizimetenni, ikonomete dipilomaasenna haanju miinji aana loonsoonnita buuxissino.
Hasaawu barera woxu ministirchi Ahimed Shide; biheeraawe baankete hidhaanchi Maammo Mihiretu, pilaanetenna latishshu ministircho Fitsum (D/r) lede fayinaansete handaarinna hajo la`annonsa bissa afantino.
Abbebech Maatewoos
Bakkalcho Bocaasa 19, 2017 M.D
