Amsaalu Felleqe
Addis Ababa:- Hawaasi quchumi biinfille leddannonna quchumu lophora jawa tiro afidhino yine hananfoonni pirojekituwa loosi harancho yanna giddo goofeenna owaante uytannota Quchumu gashshooti egensiisi.
Quchumu gashshooti kantiiwi Kaa’laanchu pirofeeser Tseggaye Tuke Itophiyu pireesete uurrinshara xawisino garinni; Hawaasi quchumi xaa yannara quchumu deerrinna lophora hasiisanno bikkaancho wonshatenni agarranni lopho widira reekkamanno garinni loonsanni hee’noonni.
Hawaasi quchumi latishshinna lopho garunni buuxisateno amandoonni mixo garinni loonsanni hee’noonniha ikkanna; Itophiyu qara quchuma ikkinohu Addis Ababunna woloottano baarawidi quchummannino dancha lawishsha ikkannore adha dandiinoonnita kulino.
Hawaasi quchuma qaddo assate dandiisiissano loossano gumullanni hee’noonniha ikkanna; quchuma hasi’noonni lophonna deerri widira reekkate loosino yanna uynikkinni loosamanni noota buuxisino.
Lophitino quchummanni dancha lawishsha ikkannore adhine loosu aana hosiisa lophitanni noo quchumma agarranni lopho widira wiinamunni reekkate assinanni harinshora noosi qeechi luphiima ikkinota xawisinohu kantiiwu; towaanyo assinoonni quchummannino baca rosicho afi’ra dandiinoonnita qummeessino.
Wolootta quchummanni adhinoonni rosichi kaiminni quchumu pilaanetenni massagamanno gede assinoonni; 701 hekitaare ale ikkitannota wodhote gobbaani ikkino garinni amadantino doogga agursiisatenni lekkaanote injiitannonna quchumu biinfillirano ikkitanno garinni loonsoonni; dandiinoonni; quchumu yannicha ikke lophanno gede assinanni hee’noonni yiino.
Hawaasi quchumi yannitte doogonni lophannonna woyyaabbino ga’labbo noosi quchuma assateno qara qara dooggara CCTV Kaameerra qansoonniha ikkanna; hee’ratenna loosi’rate injiino quchuma assate ragaannino aananno dirira dagoomaho onlaynetenna woloottano babbaxxitino dijitaale hayyonni horoonsi’ne owaante uynannita xawisino.
Dagoomaho hala’lado horo uytannonna mootimmate loosi gumaamimmano lossitanno loossa gumullanni hee’noonni yiinohu quchumu kantiiwi Kaa’laanchu pirofeeser Tseggaye; wolootta quchummara la’noonni rosicho loosu aana hosiisa dandaatenni xaa yannara Hawaasi quchumi danchu garinni lopho leellishanni no yaanniiti egensiisinohu.
Hawaasi quchumi lophoranna biinfilleno leddara dandiitannori mereerinnni babbaxxitino pirojekituwa ikkitanna; quchumu giddo hanafantino pirojekituwa harancho yanna giddo loosante goofatenni dagoomaho owaante uytanno gede assinanni hee’noonni.
Kuri pirojekituwa mereerinnino quchumu lophora jawa tiro afidhinori Addis Ababunni Hawaasa e’nanni furchora loonsanni hee’noonnihu Sidaamu daga budenna balchoomaleellishanno waalchi; Taaboori ilaali latishshi; quchumu giddo babbaxxitino basera loonsanni hee’noonniri biinfille leddanno pirojekituwa baalanti aananno Ella agani goofimarchi geeshsha loosante gooffanno yine hendannitano kantiiwu lede qummeessino.
Hawaasi quchumi dooramannoha biinfillu mereershanna daa’’attote dhuki noosiha assate dandiisiissanno loossa gumullanni hee’noonniha ikkanna; quchumu gashshooti dooraminonna deerrasi agarino quchuma assate hashsha barra loosanni afamannota huwachishino.
Quchumma manchi beetti baalanko hee’ratenna loosi’rate injiitinota ikka hasiissanno yiinohu kantiiwu; xa hee’noonni deerrinni mootimmatenna babbaxxitino irko assitanno hallanya bissanni ledo ikkatenni quchumaho haammata qansootira loosu kaayyo kalanqeennansa eo burqisi’ratenni heeshshonsa woyyeessi’ra hanaffino yiino.
Muli yanna giddono 200 ale ikkanno qansooti quchumu biinfilli loosinni bobbakkanno gede assinanni hee’noonniha ikkanna; roorenkanni manna illachishshino pirojekituwa loonsanni woyyaawa gumano la’nanni hee’noonnita coyi’rino.
IFDR Xaphoomu ministirchi Dr Abiy Ahimed, Taaboori ilaala garunni latinsanni gede worino faashonna assanni noo irko garinni loonse daa’’attote mereersha assateno jawa illacha tungoonnita amadisiise xawisino.
Bakkalcho Onkoleessa 3, 2015 M.D
