Addis Ababa:- Sidaamu qoqqowira dagate miinju horaameessimma lossitannori latishshu loossa hala’ladunni loosantanni noota Qoqqowu pirezidaantichi Desta Ledamo coyi’ri.
Qoqqowoho Hawaasi gaangaawi woradira 218 miliyoone birri ale woxu fulonni ijaarroonniti lame yannitte gorsu pirojektubba maassante owaantete fano ikkitino.
Maassote qamuraati aana hasaawa assinohu Pirezidaantichu Desta Ledamo coyi’ranni; qoqqowoho latishshu pirojektubba halashshate loossa illachunni loonsanni hee’noonni yiino.
“Ajuujanke jiroo’mitino daga kalaqate’’ yiinohu Pirezidaantichu; “konnirano, daganke horaameessimma lossate yannitte gorsu pirojektubba halashshatenni buxima dhagge assate hixamanyine loonsanni hee’noonni’’ yiino.
Qoqqowoho nooha gorsu latishshi dhuka garunni loosu aana hosiisate Federaalete mootimanna latishshu irkisaano ledo halamatenni hagiirsiisanno loosi loosamanni nootano huwachishino.
Hawaasi gaangaawi woradira calla onte jajjabba gorsu pirojektubba ijaarshi jeefamanni noota qummeesse; woradaho maassantinori lame gorsu pirojektubba tenne hixamanye bissa ikkitinota egensiisino.
Wayinna wolqate ministirchi Injiiner Habtaamu Ittefa (Dr) Isi widoonni; yannichu gibirinnu latishshi hala’lanno gede Soolaarete wolqa tuqisate loonsanni hee’noonnita xawisino.
Konnirano, Ministere qoqqowu mootimmanna latishshu irkisaano ledo pirojekte ijaarsitanni noota qummeesse; Hawaasi gaangaawi woradira ijaarroonniti arrishshote wolqanni loosannoti gorsu pirojekte jawimmasenni gobbankera umite yiino.
Gorsu pirojekte mummurantinokki owaante aa dandiitanno gede qooxeessu dagoomi agarooshshenna amado assanno gede xa’mino.
Goboomu deerrinni caabbicho halashshate pirogiraame loosu aana hossanni noota Wayinna wolqate ministere Dieetichi Sulxaani Woli (Dr) coyi’rino.
Tenne millimmo biso ikkinohu Soolaarete wolqanni loossanno gorsu pirojekte loosu aana hossanni noota xawise; baatto loosidhe galtinori dirunni saseegge laashshi’ratenni horaameeyye ikkitanno gede illachunni loonsanni hee’noonni yiino.
Sidaamu Qoqqowi Way, Shiilotenna wolqate Biiro Sooreessi Injiiner Kebbede Ganoole tenne yannara coyi’rino garinni; gorsu pirojektubba baatto loosidhe galtinore xeenu irkiraanchimmanni fushshatenni yannittete gibirinna halashshate kaa’litanno.
Maassote iillitinori lame gorsu pirojektubba xaphoomunni 300 hektaare baatto latisatenni 500 baastto loosidhe galtinore horaameeyye assitannota egensiisino.
Maassote amuraatira Itophiyaho Chayinu Embaase miinjunna daddalu amaalaanchinnanna Halantino Mootimmubba Latishshu Pirogiraame(UNDP) layinki qineessaanchi afamino.
Gaazeexu odeessaanchinni
Bakkalcho Bocaasa 19, 2017 M.D
