Gaazeexu Odeessaanchinni
Gobbanke lophitino gobbuwa qotira uurrisate baxxinohunni Teknoloojete handaarinni loonsanni loossa luphiima qeecha afidhino yiino Sidaamu qoqqowi Pirezidaantichi kalaa DestiaLedamo.
Pirezidaantichu tenne coyi’rinohu tenne lamala giddo qoqqowu loosu dandoonna Interpirayizete latishshi biiro qixxeessonni hawaasi quchumira harinsoonni 2015 M.D teknoloojete, dandootena gumulote xiinxallo, xiinxaawonna leellisho qixxaawo aanaati.
Pirezidaantichu hasaawisinni; lophitino gobbuwa lophonsara kaimu teknolooje ikkase qummi asse, giwirinnanna woloota handaarra teknoloojete ledo qineessine jiroo’mitino Itophiya kalaqate handaaraho hasiissanno irko assa hasiissannota xawisino.
Qoqqowoho Tekniketenna ogimmate uurrinshuwa kiiro 14 iillishate illacha tunge loonsanni hee’noonnita xawise;handaaru qajeelsiisaano, ogeeyyenna hajo la’annonsa bissa ikkadda ikkitinore, heewisamaano qansoota kalaqatenni uminsatanna dagoomu heeshsho woyyeessatenni ledote gobbayidinni e’’anno uduunnenna gobbayidi soorro gatisa hasiissanno yino.
Hattono gibrinnunni leellanni noo guma Teknoloojete handaarinni ledate kaajjinshe loonsanni hee’noommo yee; xiinxallotenni afi’nannihu Teknolooje gumi gobbayidi soorro gatisanno garinni qarra tirannohanna loosu kaayyo kalaqanno garinni ikka noosi yino.
IFEDR loosu dandoonna Interpirayizete latishshi ministircho dukko Muferyat Kamiiliti xawissanni;dandoote leellishonna heewo gobboomu deerrinni harinsannita xawisse, leellishonna heewo harase babbaxxitino dandoo noonsa aju wedellira injoo kalaqqanno yitinno.
Sidaamu qoqqowi loosu dandoonna Interpirayizete latishshi biiro layinki sooreessinna biirote sooreessi riqiwamaanchi kalaa Tewodros Gebiibihu isi widoonni; leellishote aana 120 ale ikkitanno teknoloojete loossa shiqansa xawise, biiro Tekniketenna ogimmate uurrinshubba halashshate loosonna maashine hirte irko assitinnota xawisino.
Qixxaawote aana heewisamaano ikkite shiqqino kolleejuwanna ogeeyye uyitino hedonni; heewo aantete heedhanno loossara dancha kakkaooshshe kalaqqannota ikkase kultino.
Bakkalcho Onkoleessa 3, 2015 M.D
