Gaazeexu odeessaanchinni
Dagate uynannita womaashshu owaantenna jirote gashshoote xawadimmanna xa’mamooshshu noo garinni loonsanni hee’noonnita Sidaamu Qoqqowi Womaashshu Biiro egensiissu.
Qoqqowu Womaashshu Biiro sooreessi Dr Araarso Gerremew tenne yannara xawisino garinni; Dagate uynanniti womaashshu owaantenna jiro gashshate loosi xawadonna xa’mamooshshu nooha ikka hasiissanno garinni loonsanni hee’noonni. Jiro dagannitenna mootimmannite. Tini jiro qoqqowu deerrinni ikko woraddateno massaganto diru giddo amandoonni baajeette hasiisanno illachira hossanno garinni balaxxe haja la’annonsa bissa xawo assite leellisha hasiissnno yiino. Babbaxxitino handaarrara hossanno baajeette gaammanni gede mixi’rate albannino dagate ledo hasaawa hasiissannotano sooreessu buuxisino.
Womaashshu xawadimmanna xa’mamooshshe lainohunni qoqqowoho sa’u sase dirrara gumaamo looso loonsoonni yiinohu Dr Araarso; konninnino, Federaalete Woxu Ministerenna Kalqete baankennino afansha afi’ra dandiinoonnita xawisino. Xawadimmanna xa’mamaanchimma buuxisateno gaammoonni baajeette faajje assa calla ikkikkinni babbaxxitino loosu hajubbara fulo ikkino woxeno faajjetenni dagate egensiisa hasiissannota egensiisino. Daga hasidhannohu halaalunni soqqammanni gedeeti; halaalunna balchoomuno garunni agaramanno gede loosa agarranni yaanniiti sooreessu lede xawisinohu. Jirote gashshooti handaarinni xawadimmanna xa’mamaanchimma buuxisateno xa’mitanno daga kalaqa hasiissanno yiino.
Dagate kasseenya lossateno balanxe halaalunni loosanna kassi yitino dagara latishsha halashshate ammanamatenninna yanna uynikkinni loosa agarrannitano buuxisino. Xaa yannara qoqqowoho womaashshu gashshooti amanyooti geinoha ikkasi buuxisinohu Biirote sooreessi; barete beeqqatenni qajeelsha adhitino bissano albillicho worroonni faasho garinni loossanno yine agarrannita lede huwachishino.
Bakkalcho Dotteessa 26, 2015 M.D Hamuse
