Abrahaam Saamueel
Addis Ababa:- Kakkachuullu woy ane hedo calla roortanno yitannori hajonsanna hedonsa polotiku mannooti hasaabbannokkinna dagano qolte sharrantannokki gede assate looso loossanni no yaatenni Sidaamu Qoqqowi Jireenyu Paarte egensiissino.
Jireenyu paarte loosu gumulsiisaano miilinna Sidaamu Qoqqowui Jireenyu Paarte Sooreessi Kalaa Abrahaam Maarshaalo Bakkalcho gaazeexira xawisino garinni; kakkachuullu ane hedo calla roortino; ani callu gobba gashsheemmo; wolootu massagge diaffanno yitannori daga sharrantannokki gedenna; qoleno polotiku mannooti hasaabbannoki gede assate. Kuri kakkachuullu bissati qara hedonsa, “Gobbate giddo roduuwimmanna qoleno mittimmatenni loonse lophinannikki gede assate; tenne hedonsa wolqatenni xiiwa hasidhanno ikkinninna hasaambe hedotenni sharramme sumimme abbinannita dihasidhanno” yiino; kalaa Abrahaam.
Tini wolqa manna shaatenni, illamurcho ikkinoha woqaasatenni, wolqatenni huno loosse wole loosanno manni aana guficho ikkate hedooti yee; mittu qoqqowira calla daggino huno ikkitukkinni baalunku qoqqowiranna gobbate ikkinota huwata hasiissannota kulino. Togoo wolqa hedote moolle noonsa daafira, mootimmate gashshoote wolqatenni xiiwo kalaqqe daga kakkayisse tugate looso ikkinota kulinohu Sooreessu kalaa Abrahaami; mixi`nenna xiinxalline gobba diigate loonsoonni looso ikkinota huwachishino.
Gobba ikkaddanna fullahaano bissanna massagaano konni kakkachuullu bissanni hoogganni hadhanni noo; tenne bissa hedono dagano insa waajjite sharro agurte mootimmate aana ka`ara hasattonsa ikkinota xawise; daga baala roduuwimmate ayyaaninni mittimmatenni halante hunaasine sharrama noonsata kulino.
Tenne yannara massagaanotenna gobbate aana harinsanni hee`noonni coyi gara ikkinokkita Amaaru Qoqqowi dagano ikkitowolootu baalunku afa noonsata xawisinohu Sooreessu; hunote wolqa daga sayisse seeraho reqecci assite aa hasiissannota qummeessino. Kalaa Abrahaam xawishshi garinni, polotiku mannootinna massagaano hixamanyite kakkachuullu xoqoltu Kalaa Gimi Yeshixilihu faale harunsite isi mixo gumaame assatenna jeefisate hiikko garinnino badhera higgukkinni kaajjite loosa hasiissannota coy`rino.
Kakkachimmate loosi Itophiya diigate ikkinota xawisinohu kalaa abrahaam; konne kakkachimmate assootenna tenne bissa hunate baalunku roduuwimmate ayyaaninni mimmitu ledo halamme loosa calla woyyitannota buuxisino. Kuri hunaano wolquwa loossanno xagarronna sharre roorenkanni gobba kaajjishannota xawisinohu Sooreessu; albi annuwankenni daggino mittimma seekkine kaajjinshe sufa hasiissannota huwachishe; Kalaa Girimi Yeshixilihu lubbo keeraanote qote fooliishshidho;maatesinna fiixu firisira kaaliiqi shesho soonsa yiino.
Bakkalcho Dotteessa 26, 2015 M.D Hamuse
