Qiddist Gezzaheny
Addis Ababa:- Jireenyu harinsho mooraanonna giwaano digufissanno yiino Jireenyu Paarte Laynki Pirezidaante Kalaa Adem Faarah; Kalaa Girmi Yeshixilihu reeshsha geegiissini yannara coyi’ranni, mooraanonna kakkachootu Jireenyu doogo gufissannokkita kule macciishaminsoi dadille xawisino. Kalaa Girimi maate, Amaaru dagara, Jireenyu paarte miillaranna hattono Kalaa Girimi Yeshixilihu ledo kakkalantino mannooti maatera shesho halchitino.
Kalaa Girmi Yeshixilihu; gobbate, dagatenna paartete assinoti luphiima kaa’lo mamooteno ikkiro dihambannite yiinohu kalaa Ademi; wo’manti paartete massagaanonna miilla isi kakkalamino illacha jeefo iillishate jawaanteemmo yiino. Kalaa Girmi lowo geeshsha manna baxannohanna qinaawa; mannoomitte uddi’rino mancho ikkasi kayisinohu kalaa Ademi; gobboomu ajuuja amadino egennaamu dagate soqqamaanchootinkanni yiino.
Itophiyu halaalinna Amaaru daga sufo noo qoossonna horo agarantanno harinsho garunni huwatinoha; wo’manta Itophiyu daga gutu Jireenyiwa iillishshara dandiitannota dimokiraasetenna dagate hedo amadinoha, dagatenna dagoomu mittimma kaajjishate hasiisannoha mittimmate buusa hashsha barra yiikkinni gatamaranni keeshshinoha xeertise hedanno massagaancho ikkinotano lede kayisino.
Kalaa Girmi Yeshixilihu babbadooshshe kulannoha; gibbonna gaance tiyyi’re sharramannohanna wo’manka woyte farcotenna taalleenyaho uurrino halaalaancho Jireenyu massagaanchooti yiinohu kalaa Adem Faarah; gobbatenna dagate hasiisanno yee hedinore xawoho shiqishannohanna korkaatunni ammananno wodanaamonna egennaamo massagaancho ikkinota coyi’rino.
Kalaa Ademi xawisanni; konne assoote iillishshinori manninaatunni fultinore moyichimmate widira soorrantino giwaanooti; dagate massagaancho shitanni keeraano qansooti lubbote hee’ratenna mannihimmate hobbaati qoosso xiibbanna wo’mitara dandiitannoti sufote horo dino. Kuri giwaano rodoonke shitinohu hedote aliidimmanna massagote aana safantino poletiku sharro heedhannokki gede assatenna amanyootu hoongira injoo kalaqate hallanyunninna gaamotenni ikkite hedonsa wonshirateeti; kuni kayinni co’ontanni wo’mannoha dikkino.
“Itophiyu giddo amanyootu hoongi, keeraano shaa; dagate massagaancho shaa luphiima waaga baatisiissannota buuxinseemmo” yiino. Hunaano seeru albaanni shiqishate loonseeemmo yiinohu kalaa Ademi; dagate dhaggenna bude xeisate sharrantanno giwaano amanyoote amadisiisate assinanni sharro aana dagoomu mootimmate qotira uurratenni hunaano seeru albaanni shiqishate looso kaa’lanno gede woshshatto assino.
Jireenyu paarteno kalaa Girma Yeshixilihu maate qotira uurritannota lede buuxisino. Geegote amanyooti aana federaaletenna qoqqowunniri luphiima mootimmate loosu sooreeyye, macca mannooti, fiixisinna jaallasi, sharrote jaallasinna maatesi afantino.
Hattono amanyootu aana IFDR Xaphoomu ministirchi Dr Abiy Ahimed, Layinkihu xaphoomu ministirchi kalaa Demmeqe Mekonnini, Jireenyu paarte layinki pirezidaantichinna borrote mini sooreessi kalaa Adem Faarah, Addis Ababu quchumi Kantiiba dukko Adaanech Abeebetinna kalaa Girmi maate riqiwaamaanchi kalaa Hayile Yeshixilihu daraaro wortino.
Bakkalcho Dotteessa 26, 2015 M.D Hamuse
