Qiddist Gezzaheny
Addis Abeba:- Gebeta Lehageri Koyishu Pirojekte biso ikkitinoti Halaala Keellu Rizoorte dhaggeefachishshanno daa’’attote base ikkitinota xaphoomu ministirchi dokter Abiy Ahimed (DR) Xawisi. Xaphoomu ministirchi dokter Abiy; “Gebeta Lehager” Koyishu Pirojekte biso ikkitinota Halaala Keellu Rizoorete maassi’re fanino.
Maassote amanyooti aana xaphoomu ministirchi dokter Abiy Ahimed assino hasaawinni; Gibe 3 wolqate kalaqo widoonni kalaqamino mannu loosino garbi qooxeessira afantannoti Halaala Kaallu “Gebeta Lehager” Koyichu qacce Pirojekte biso ikkitino Halaala Keellu Rizoorte giddo hanqafante lattinoti xaggeefachishshanno daa’’attote base ikkitinota coyi’rino.
Halaala Keellu Rizoorte boohaarshu base ikkasenni ledote dhaggetenna budu Muuziyeemenna xiinxallote mereershuwa hanqaffe amaddinota ikkase qummi assinohu xaphoomu ministirchi; Wodiidi Galchimi Itophiyira afantanno Dawro Zoone illete baxissannota baattote ofolla, dhaggetenna budillaancho daa’’attote base afidhinota ikkase kayisino.
Itophiyu daga batinye loossara surre’ne fa’nantanno gede dagatenna qooxeessu keeri lowohunni afamanno Dawro zoone daggine haaro hedo kalaqatenna giddoyidi keere afi’rate “Gebeta Lehager” Koyishu pirojekte biso ikkitinota Halaala Keellu Rizoorte towattinanni gede woshshatto assino. Xaphoomu ministirchi kapho uddisiinse halaale assa dandiinannikkitanna, kapho buurre halaale lawisate wo’naala Halaala Keellu gedee pirojektuwa kalaqate didandiissanno yaanni huwachishinno.
Itophiyu batinye afoonna bude afidhinote yinohu xaphoomu ministirchi; konne halaale meessi gede assine adhanna rosiisi’ra hasiissanno yiino. Itophiyu batinye daganna dagoomi afamannowaati yinannihu; budunna afuunni calla ikkikkinni kalaqamunnino lowo geeshsha biifado dana giddose amaddino gobba ikkase huwata hasiissanno; konninnino mittu qooxeessi wolunni baxxannohu umisi kalaqamu elto amadinoha ikkasinni garunni latinse horonsi’ra hasiissannota illachishe coyi’rino.
Dawuro daga Halaala Keellu Rizoorte albi annuwi gede dona assite amadde ilamate reekkissannonna miinju horonsi’raanchimma buuxissanno gede huwachishinno. Babbaxxitino qoqqowubbanni dargaho afantino pirezidaantooti coyidhanni; kilaasteretenni bebbeenke loonsoonni Halaala Keellu pirojekte latishshu loosi qooxeessubba noonsa kalaqamu elto ledo xaadinse gumula qooxeessa roorenkanni goshooshannoha assitinota coyidhino.
Wodiidi qoqqowi pirezidaantichi kalaa Ristu Yirdawuhu; Halaala Keellu Rizoortera safote kincho tungi yannara qooxeessu wodiidi qoqqowi hundaanni noota qummi asse; xa kayinni Wodiidi Galchimi Itophiyi daga qoqqowi biso ikkeenna maassote amanyooti aana afamasi baxxitino macciishshamme kalaqqinosita coyi’rino.
Turistete pirojektuwa halashsha noonsa horo bikkinni mittu mittunku qansichi gobba noose dhuka huwatte uminsa qeecha fultanno gede woshshatto assinoonni.
Bakkalcho Dotteessa 26, 2015 M.D Hamuse
