Abrahaam Saamueel
Addis Ababa:- Tayxe Badheessu yanna giwirinnu loosira ikkannoha 11 kume 300 kuntaali ale dooramino wixa loosidhe galtino dagara bebbeenkoonnita Sidaamu Qoqqowi Irshunna kalaqamu jiro latishshi Biiro egensiissu.
Biirote Sooreessi Kalaa Memmiru Moke Bakkalcho gaazeexira xawisino garinni; tayxe 2015M.D qoqqowu deerrinni Badheessu yannara ikkannoha dooramino wixa 11 kume 300 kuntaali ale loosidhe galtino dagara bebbeenkoonnita egensiisino.
Kalaa Memmiru xawishshi garinni, tayxe diro Badheessu loosira ikkanno yine 15,000 kuntaala dooramino wixa shiqishate mixo amandoonniha ikkanna; konni giddonni xibbuunni 75% ale loosidhe galtinorira bebbeenkoonnita huwachishino.
Biiro saiha 9 agani mixote jeefishsha keeno sa`u barrubbara assitino. Biironniti jawa mixo laalchonna laalchimma lossate yiinohu Kalaa Memmiru; baattote qixxaawonni kayinse laalcho gamba assate geeshsha ha`nanniti harinsho jawa gede danchate. Loosidhe galtino dagano konni bikkinni gumaamma ikkitinota xawisino.
Sidaamu Qoqqowira alichaame, mereerimanna gammoojjaame diilallote akati noota kulinohu Biirote sooreessi; gammoojjaame baattora ikkanno looso bande mixi`ne loonsanni hee`noonni; arri yannara tenne gammoojjaame baattora ikkannoha addi addi gorsunna qamadete looso bande loonsoonniha ikkanna danchu garinni gumulaminota kulino.
Goyrete yanna loosi mixi`noonni garinni dancha gede gumulaminota kulinohu Sooreessu, ledoteno buna halashshanna laalchonna laalchimma lossate ragaanni woyyaawino gumi borreessaminota buuxisino. Buna halashatenna laalchonna laalchimma lossate 27 miliyoone chigginye qixxessine kaasate giddora e`noonniha ikkanna; haaroonsate loosono loonsanni hee`noonni yiino.
Sai honsu agani giddo biirote deerrinni loosono loonsanni hee`noonni yiino. Sai honsu agani giddo biirote deerrinni haanju harumi looso qineessate ikkitannota 165 miliyoone haqqu sircho qixxeessate mixo amande 127 miliyoone chigginye kayishshi qixxaawinotano hattonni.
Laalchonna laalchimma ledannore tekinoolooje horoonsi`ra, dikko kaima assine loosa hooga, dooramino wixe ikkadu garinni iillisha hooga, qasiisote tekinoolooje baalankawa iillisha hooga, bunu laalchinni afi`nanni gumi kalqete deerrinni ikkado ikka hooga laafu midadinni keennoonnita kulinohu Sooreessu; kuri handaarranni loossa albillicho woyyeessinanni ha`ra hasiissannota torbinoonni yiino.
Tayxe diro leellinoha laafa midaado woyyeessine laalchonna laalchimma lossate faasho worroonitano kule; baxxinohunni Sidaami giddo sagalete qarra tirate weesete sircho halashshine lossatenna kaasate jawaante sharrammanni hee`noonnita huwachishino.
Dooramino wixi anje korkaatinni boode woradda Borrichu, Bilaatte hattono Hawaasi gaangaawi ikkado wixa afi`ra hoogansanni baattote giddora guma eesse xaphi assinokkita qummeesse; xaaddino xe’ne tirate dooramino wixa shiqishshanno bissa widoonni ikkine sharrammanni hee’noonnita buuxisino.
Haanju harumi loosono qineessate hawadi yannara kaansaanni kaayishsho 300 miliyoone ale haqqu sircho kaasate qixxaanbe hee`noonnita egensiisino.
Bakkalcho Dotteessa 19, 2015 M.D Hamuse
