Abrahaam Saamueel
Addis Ababa:- Keeru bowiranno gede baalunku Federaalete mootimma ledo noonke xaadooshshe kaajjinshe sunfeemmo yaanni Tigirayete Qoqqowi Pirezidaantichi Kalaa Geetachewu Redda coyi’ri.
Wodiidi Afirikira Piritooriyaho Birra 23, 2015M.D mootimmatenna HWHT mereero keeru sumimmenni daynoha guma “Olu ikkonke; keere bowirsino” yaanno uminni Addis Ababaho Jaaloomittete Paarkera afamishshunna galatu qixxaawo harinsoonni.
Pirogiraamete aana hasaawa assinohu Kalaa Geetaacho Radda; Piritooriyu keeru sumimme gedenoonni daganna qoqqowo horaameeyye assitannota haammata loossa loonsoonni yiino. Olu uurreenna keeru bowiranno gede baalunku wo`naaleemmo; Federaalete mootimma ledo noonke xaadooshshe roorsine kaajjinsheemmo; wolootu qoqqowubbano konne loossanno yine agarreemmo yiino.
‘’Keere bowirsa mittu mittunkuwiinni agarranniho yiinohu Pirezidaantichu; xaa geeshsha loonsoonni loossa maala’linannireeti; baxxinohunni, sumimme rahotenni gumulo afidhanno gede Xaphoomu Ministerchi Dr Abiy Ahimed leellishino bareenderanna murci’rara wodaninni galateemmo’’ yiino.
Konni gedensaanni, togoo bareende sufa nootanna gatino loosino amandoonni garinni gumulo afi`ra noosita qaagiissino. ‘’Tigirayete dagawiinni baxillunna keeru sokka haa`re dayoommo’’ yiinohu Geetachew; ‘’Tigirayete daga olunna urde giwisinonsa; looqqi assinonsa; konnira, xa afidhino keeri badhera higara dihasidhanno’’ yiino.
Sumimme daggara halantinore baala galate sainohu Kalaa Geetaachew Redda; albillicho harinshora ammanamate ayyaananna keere kaajjishate loosi uminkeha nafa ikkiro, albillicho ba`ino maate hase abbate; diigantino uurrinshuwa wirro gatamartenna gobbate farco heedhanno gede assinanni millimmo giddo Afiriku roduuwi ledonke ikkitannota ammaneemmo yiino.
Poletiku bissa keere abbanno garinni hasaawa dandaa noonke yiinohu Kalaa Geetaachew; hadho tufanno arrawi keerenna baxille lallawa hasiissannosi yaanni xawisino.
Bakkalcho Dotteessa 19, 2015 M.D Hamuse
