Abbebech Maatewoos
Bishooftu:- Itophiyu ayyarete wolqa Itophiyu gottimma leellishannoho yaatenni IFDR Olu Wolquwa Xaphioshshu Itaamaazhoor Shuumichi Fiild Maarshaal Birhaanu Jula xawisi.
Fiild Maarshaal Birhaanu tenne lamala giddo Itophiyu ayyarete wolqa hoowe giddo hadhino fotote reqecconna “Semayu Yenya Newu” yaamantino filmete maasso amanyooti aana xawisino garinni; xa gatamarranni hee`noonnihu Itophiyu ayyarete wolqa Itophiyu gottimma leellishannoho.
Fiild Maarshaal Birhaanu xawishshi garinni; sa`u shoole dirrara rifoormete loossa loonsoonninsa gargarooshshu uurrinshubba giddonni mittu ayyarete wolqaati. Konninni, uurrinsha gobbate ikkanno deerrinni soorrote loossa gumultino.
Itophiyu ayyarete wolqa techo Su-27 yannitte olu Jette lede wolootta olu Jettubbanna Helikoopterubba kowiicho gatamarranni dhuka lossidhino yiinohu Fiild Maarshaal Birhaanu; xaa yannara luphiima lophote doogo aana afantanno yiino.
Soorro afisiissino gummannino mittunna umihu ayyarete wolqa ikkinota xawisinohu Fiild Maarshaal Birhaanu; Itophiyu danna addaxxisanno garinni agartanno gobboomu olanto gatamarranni hee`noonni; konne looso filmete ogeeyye egensiisatenni ilamate reekkamanno gede assa hasiissanno yiino.
Itophiyu Ayyarete Wolqa qaru Hajajaanchi Leetenaal Jeneraal Yilma Merdaasa isi widoonni; bareedda Itophiyu ayyarete wolqa gobbate bayirreenya jiffanno olubbara qeelle assatenni luphiima qeecha fultinota qaagiisse; babbaxxitino gaadubbara beeqqinotanna naaxxissanno qeelle maareekkantanno gede qeecha fulinota coyi`rino.
Sa`u onte dirrara kuni bareedu uurrinshi Itphiyaho ikkanno rifoormete loossa harisanni keeshshinota coyi`rino. Baxxinohunni, haruudde tekinoloojubbanni umosi qineessatenninna yanna abbitino qodhonna olu Horophila wonshanni afamannono yiino.
Uurrinsha sa`u shoole dirrara baxxinohunni gatamaarshu handarinni gumultino rifoormete loossanni konni albaanni gobbaydi gobbara hadhanni keeshshitinota gatamarshu loossa gobbate giddo ogeeyyenni gumulate dhuka kalaqase soorro leellishshannota buuxisino.
Bakkalcho Dotteessa 19, 2015 M.D Hamuse
