Abbebech Maatewoos
Hawaasa:- Sidaamu daga kalaqamunni egennaame dagaati. Ha’nura egennonsa yannitte egennonni irkinse aantino ilamara sufisiisa kayinni tenne ilamawiinni agarrannite yiino; Sidaamu qoqqowi pirezidaantichi kalaa Desta Ledamo.
Pirezidaantichu tenne coyi’rinohu tayxeeha Sidaamu daga haaru diru soorro ayyaana Hawaasa sooreessu Gudumaalira ayirrinsi yannaraati.
Pirezidaantichu sokkasinni; Sidaamu dagata ha’nura egenno yannitte egennonni irkinse aantino ilamara tareessate Hawaasi Yuniversite ledo halamatenni xiinxallo hananfoonnita qummeesse; hananfoonni xiinxallono illacha tunge harancho yanna giddo xaphi assinannita egensiisino.
Fichee Cambalaallate ayyaani batinye hornyuwa giddosi amadinoha Sidaamu daga bayira ayyaanaati; yanna kiirre dironna sane diro assine mittu dirinni wolu diriwa sa’nanni haaru diri ayyaana ikkasinni haaroo’minanni hagiirru barraati yaatenni ayyaanu mayimma xawisinohu Pirezidaantichi; Fichee Cambalaalla diru giddo loosamino cubbi gatona yaamamanno gede geerru usura amadde Magano huuccitanno ikkitonni hananfanni ayyaana ikkasi coyi’rino.
Koma amande haaro diro disa’nanni; haaro diro haaro hexxonninna haaru ayyaaninni adhinanniho; dadillinohu hagiidhanno, baxillu bati’ranno, mittimma kaajjitanno, hoongohura beenkannihonna atootunniho. Kuri hornyuwa xaphi assine la’niro gatona yaanna albaanni nooha macciishsha mittimma kaajjishshanno.
Ikkollana, muli yanna kawa doogimale biilloonye hasidhanno wolquwa dagate mereero abbitanno babbadooshshi Sidaamu daga dixawisannoho yiinohu Pirezidaantichu kalaa Desta; kuri wolquwara macca aa dihasiissanno.
Roorenkanni mittimma kaajjishi’ra, qooxeessu ga’labbo agadha hattono qooxeessu gada ledo danchummate halammenna xaadooshshe kalaqi’ranna togoo xaadooshshi alba hige sufanno gede jawaachisha hasiissannota duu’re huwachishino.
Qoqqowoho buxima hunate mixonni hananfoonniri latishshu loossanni guma la’’a hananfoonni yiinohu Pirezidaantichu; konni garinni mittimmatenni latishshaho bobbankummoro harancho yanna giddo qoqqowonke woyyinoha, dagate heeshshora injiinohanna woloottu halchitannoha assineemmota huluullantinoonte yaatenni ayyaana ayirrisate Gudumaale fultino dagara qummeessino.
Jeefoteno, ayyaanu gobbankera keerunniha, atootunnihanna duuwunniha ikkanno gede halchosi xawisino. Ayyaanu aana Federaaletenna babbaxxitino qoqqowubbanni koyisantinori luphiima mootimmate loosu massagaanonna koyisantino wosinna afantino.
Bakkalcho Dotteessa 19, 2015 M.D Hamuse
