Qiddist Gezzaheny
Addis Ababa:- Olu tunsichoho; keeru xawaabbaho; Itophiyu keeshshino olu tunsichinni xawaabba ikkino keeriwa reekkantino yiino Xaphoomu ministirchi Dr Abiy Ahimed. ‘’Olu ikkonkena, keere kaajjinsho’’ yitannota Piritooriyu keeru sumimme harunsine harinshote irko assitino baalira afanshunna galatu qixxaawo Addis Ababu Jaaloomu xawira harinsoonni sayinsummo Sambati barra.
Qixxaawote aana leelle sokka saysinohu Xaphoomu ministirchi Dr Abiy Ahimed; ‘’Itophiyu jiroo’mitanno; latishshahonna mittimmasera batisse loossanno; olu tunsichohonna bushaho; afuunninna Afemuzetenni fulannohu giddonna maala shaannoho; keeru xawaabbaho.
Xa Itophiyu keeshshitino olu tunsichinni xawaabba ikkino keeriwa reekkantino’’ yiino. Gibbo uurrinse keere kalaqate ikkado ikkitinokki korkaattanna taalo ikkitinokki yanna dino yiinohu Xaphoomu ministirchi; keeru latisanno, jiroo’misanno; shotu garinni fulle ea dandiinanni gede assanno. Konnira, keere kaajjinshe sufisiisa hasiissanno yiino.
Ninke Itophiyu daga noonke qarra hasaawunninna amaalammetenni tira bilchaantete safo ikkitinota huwata noonke yiinohu Xaphoomu ministirchi; baino coyinni biifadonna hexxo aannore kalaqa dandiineemmo yiino. Bero sa’ne ga’ara woyyaawinore kalaqate loonseemmorenna jawaanteemmore ikka agarantannonke yiino.
Techo gatona yaanna araara ikkinohura badhera hinge baino coye taashsha, hiiqqaminoha sissa, madhi’rinoha xagisa, qarraminoha irkisa, bero woyyaawino baxillinni haaroonsanna sufisiisa dandiitanno safo tuga hasiissannota xawisino. Itophiyu daga olunni bareedda ikkinoommota kalqe naqaashete; keerunnino bareedda ikkate gawajjamino baali fiixa’yaati yine irkisa hasiissannonke yiino.
Keeru harinsho aana beeqqo assitino bissa baalantera afamishsha aatenni galatano shiqishinohu Xaphoomu ministirchi; olunni fulle keerunninna wirro gatamarshi aana hasaambanni hee’noommoha ikkasinni techoo barri Itophiyaho baxxino barraati yiino.
“Amaaletenni aleenni shetto rosiissankera hasiisannokkihura olunna shettote yanna gooffeenna; bero sa’ne ga’ara woyyaawino coye loosate qixxaawa noonke” yiino. Olunni fulle keerunna wirro gatamarate aana hasaambanni hee’noommoha ikkasinni barru baxxino barraati yee; aantete Jireenyu paarte laynki pirezidaantichi massagooshshinni baalante qoqqowubba gashshaano Meqele hodhitanno yaanni coyi’rino.
Keerenke halamatenninna mittimmatenni Itophiya kaajjado safo aana worre sufisiisa noonke yiino. Xaphoomu ministirchi Dr Abiy Ahimed Aliyye Itophiyira kalaqante sa’ino gaance keeru sumimmenni gumulantanno gede qara qeecha fultino bissara galatunna afamishshu tajete woraqata aamansha uyinonsa.
Qixxaawote aana Afriku mittimma komishinerchi Musa Faaki Mahaamati; keeru sumimme aana beeqqitino bissa, Laynkihu xaphoomu ministirchi kalaa Demmeqe Mekonninih lede qoqqowubbate pirezidaantooti, gobbate geerri, diplomaatootunna woloottu koyisantino wosinna afantino.
Bakkalcho Dotteessa 19, 2015 M.D Hamuse
