Addis Abeba:- Sudaanete daga xaa yannara xaadinonsa qarrinni fulate dandiissanno egennonna dandoo noonsa dagaati yiino xaphoomu ministirhi dokter Abiy Ahimedihu.
Xaphoomu ministirchi sokkasinni; qachu gobba sudaanete daga hundinni hanaffe wolaphonsa baxxannorenna gobboomu ayirrinyensa agarsiisse keeshshitino daga ikkansa xawisino. Sudaanete daga xawinsanni haammatu amalinsa mereerinni wosincho adhatenna shaqqillinsa woluri aleenni luphi assine kullanniho yino.
Sudaanete daga akatinsanni ayirradda ikkansanni hiikko garinni ayirrinyensanna wolaphonsa sayisse uyitannore ikkitinokkita xaphoomu ministirchi xawise; sudaanete daga uminsa qarra uminsanni tirate jawa dhuka afidhinore bayira daga ikkansanni Sayikki anna hasidhannore di ikkitanno yaatenni xawisino.
Ninke Itophiyu daga tenne ayirrado Sudaanete daga xaa yannara xaaddanni noo mitiimma egennotenni fultara dandiitannota noonke ammana xawisate banxeemmo yino sokkasinni. Xaphoomu ministirchi egensiisino garinni; Sudaanete daga uminsa qarra uminsanni tidhitanno gede agura hasiissannoha ikkanna hiittino gobbayidi anga e’annohu keerenna hasaawa lainohunni calla ikka noosi.
Itophiyu mootimmanna dagano Sudaanete daga giddoyidi qarransa rossino hayyonni uminsanni tidhitanno gede halchitannotanna sudaanete daga horo ayirrisanteenna la’’a hasattonsa ikkase lede xawiseemmo yino xaphoomu ministirchi sokkasinni.
Amadantino odoonni IFEDR layinki xaphoomu ministichinna gobbayidi hajo ministirchi kalaa Demmeqe Mekonninihu; Sudaanete aantaanchu gobbayidi hajo ministirchi Ali El-Sadiqi ledo bilbilunni hasaawinoha ikkanna;
kalaa Demmeqe dagoomittete qoolisi aana borreessino garinni, bilbilunni assitino hasaawinni Sudaanete harinsanni hee’noonni oli Itophiya lowo geeshsha huluullisinoseta xawise; Itophiyu Sudaanete daga qotira uurrase xawisatenni olu korkaatinni lubbonsa hoogginorinna gawajjantino dagara macciishshaminosi dadille xawisino.
Shiima barrubba gattino Remedaani qoorrete aganira sudaanete daga uminsa hayyonni albi keerinsawa higgannota ammanannota kalaa Demmeqe xawisasi Itophiyu Odoote Owaante odeessitinno.
Bakkalcho Dotteessa 12, 2015 M.D
