Addis Ababa: – Itophiyaho ayirrinsanni ayyaanna turizimete handaarira danchu qeechi hee`rannonsa gede assate loonsanni hee`noonnita xawinsi.
Itophiyu Turizimete Miniseteere Ministircho Deetitte dukko Salamawiti Daawititi Itophiyu Pireesete Uurrinshara xawissinonte gede; Itophiyaho ayirrinsanni ayyaanna turizimete handaarira danchu qeechi hee`rannonsa gede assate loonsanni hee`noonni.
Kuri giddo diru dirunkunni ayirrinsannihu Fichee Cambalaallate ayyaani turistoota goshooshatenna turizimete lopho halashshate widoonni jawu dilaali hee`ranno gede assinanni.
Fichee Cambalaalla kalqete deerrinni amammandannikki dona ikke UNESKOte borreessaminota qaagissitinoti Dukko Salamaawiti; ayyaanu yannara turistootu basete geeshsha hadhe daa”attanno gede koysannoha ikkinohura; baalanku daganna dagoomi budenna dona hattono turizimete bayicho halashshe egensiisannoho yitino.
Budunnita ikkito amma`note ayyaanna turizimete noonsa dilaali jawaho yitinoti Ministircho Deetitte, ministeere turizime baqqi assate ayyaanu xaphitte qixxeessitino yitino.
Tini xaphitte Fichee Cambalaallate budu amuraate daa”atate hadhanno turistooti babbaxxitino uduunne adhite Sidaaminna Hawaasi qooxeessira noota biiffannota turizimete mereershuwa daa’’attanno gede assannota kultinoti Dukko Salamawiti; kunino turizime baqqi assate jawa dilaala afi`rinota huwachishino.
Ministercho Deetittete xawishshi garinni, qoqqowaho nooti Hoteellate owaante kakka`anno gede waagu lexxo ajisha noonsa. Hattono, uynanni owaante isilancho ikkitanno gede loosa noonsa.
Konni ledo amadame Minsteere turistootu keeshsho seedisate babbaxxino loossa loossanni noota qummeesitinoti Minister Deetitte, Fichee Cambalaallate ayyaanira Hoteella waagunna uynanni owaante widoonni woyyaawino looso loosanno yine agarranni yite qaagiissitino.
Sai dirinni kaayise turizimete bobbanke woyyaabbanni dagginota kultinoti dukko Selaamaawiti; konni albaanni keeru hoongenninna COVID fayya korkaatinni turizime qiidde keeshshitinota kaayisse, keeru sumimme ledo amadame turistete kiiro konne diro lexxitanni dagginota huwachishino.
Sidaamu daga diru soorro Fichee cambalaallate ayyaani bero Fiixoori hawarrinni hanafinohu techo cambalaallatenni jeefamannoha ikkirono; eeli geeshsha baadiyyete lame lamalara iibbadu garinni ayirrinsanniha ikkasi qaangannite.
Bakkalcho Dotteessa 12, 2015 M.D
