Gaazeexu Odeessaanchinni
Addis Ababa:- Hawaasi quchumi kantiiwi kaa’laanchu pirofeeser Tseggaye Tuke Sidaamu daga haaru diru soorro Fichee Cambalaallate ayyaanira hawalle iillishinke/ iilishi’ne! yaanni dancha halchosi xawisino.
Fichee Cambalaalla Sidaamu daga haaru diru soorro xawishshaati; Sidaamu annuwi (ayyaanto) beeddahenna agana la’e diru kiiro shallagatenni akkala diro geegeessite haaro diro hagiirrunninna atoomunni adhineemmo gede qixxeessitinonke bayi’ra ayyaanaati yiino Kantiiwu sokkasinni.
Sidaamu daga budu amanyooti garinni; Fichee Cambalaalla mannu ooso ayirrissanno ayyaana calla ikkikkinni kalaqama baalanko ayirrinye uynanniha ayirrado, jawanna taalleenyu ayyaanaati yiinohu kantiiwu;Ayyaanu kalaqamaho noosi ayirrinyi kaiminni ayyaanu yannara saada digorrinanni; haqqe dimurranni baattono diloonsanni yee; konne hornya sufisate dilaali angankera noo yaanni qummeessino.
Ayyaanu haaro diro lowo atoominni, mixonni, hexxonninna dancha halchonni adhine; sayinsummo yanna baalantera loonsoommorira Kaaliiqa maaro xa’mi’neemmoha; gatona yaanna baxillu dirrannoha; noosihu noosikkihu ledo beeqqe itanninna aganni hagiidhannoha; haaro hedonna dancha looso ikkinohura budenna amma’note roso fiixoonse amadinoha baalunkura taalo ayyaana ikkasino xawisino; Kantiiwu sokkasinni.
Fichee Cambalaalla mittimmate ayyaanaati. Qeexaalunni mittimma, saga’linanni woyteno, Hore, Dambaariyyotenni, Sooreessu Gudumaalira kandanni Faaronni, Hulluuqunni mittimma rosiissannonke. Ayirrisanna ayirrisama, hanqafaanchimma, roduuwimma, keeru Cambalaallate ayyaani xawishshaati yaannino sokkasi kaajjishino.
Bakkalcho Dotteessa 12, 2015 M.D
