Abrahaam saamueel
Babbaxxitinoti gobbuwate massagaano, jajjabba dipolomaate Itophiyaho harunsite assitanni noo towaanyo Itophiyu haaro dipolomaasete fooliishsho widira reekkamanni noota leellishshannota Gobaydi Hajo Ministeere xawissu.
Faajjete loosu towaanyora Addisi Ababa einohu Hangaari Gobbaydi Hajonna Daddalu Ministeere ministire Pitr Siyaarto babbaxxitino mootimmate loosu sooreeyye ledo hasaawa assino.
Sai Oyimbara Layinkihu Xaphoomu Ministerichinna Gobbaydi Hajo Ministire Demmeqe Mokkonninihu ledo lamente gobbuwa baalunki coyi halammenna xaadooshshe kaajjishshanno hajubba widoonni amaaltino.
Gobbaydi Hajo Qaalu Saayisaanchi Ambaasadderi Mellese Alem hasaawa lainohunni xawishsha uyno. Hangaari Gobbaydi Hajonna Daddalu Ministirchi Piter Siyaartohu ledo qoinaawino haswaa assinoonnita coyi’rino. 1956 M.D hananfoonniha lamente gobbuwa xaadooshshe bowirsate dandiisiissanno hajubbanna qooxeesunna dagate halamme hajubba aana hasaabbinota kayisino.
Layinkihu Xaphoomu Ministirichinna Gobbaydi Hajo Ministerichi Kalaa Demmeqe Mokkonninihu, seeda diro kiirsisinoha lamente gobbuwa xaadooshshe kawiinni rorino garinni kaajjisha hasiissannota xawisinota Qaalu Sayisaanchi xawisino.
Hangaarete Gobbaydinna Daddalu Ministerichi Piter Siyaarto isi widoonni, minjunna Siivilete Aviyeeshine loosinni halamme loosate sumimmete sanade malaatisate shiqishino xa`mo aana Itophiyu maayye yiinota Ambaasadder Mells xawisino.
Hangaari afantanno way latishshinni, giwirinnunni, rosunninna wolootta handaarubbanni halammensa kaajjishate hasaabbinota lede xawisino. Awuropu Mittimma Itophiyu ledo noose xaadooshshi bowiranno gede Hangaari hasiissannoha dancha qeechase fultannota Ministirchu buuxisinota kayisino.
Lamalate babbaxxitino gobbuwa massagaanonna dipolomaatootu Itophiyaho assitinoti harunsitino towaanyo, gobba olunni woyaawino keeri widira hattono haaruudde dipolomaasete fooliishsho widira reekkantinota leellishanno yiino.
Ambasaadder Melles lede, Itophiyu gobbaydi xaadooshshi handaarinni huwachishate, baxillaano gobbuwa batisate istiraateeje qinaabbino garinni loosu aana leellishanni noota hasaawino.
Itophiyu umisenni sae, olluu gobbuwara keere gufisanno coyi qiideenna keerenna ga`labbo heedhanno gede umiseha dilaala fulate noose qeecha lainohunni, babbaxxitino gobbuwa massagaano ledo hasaawa assitinota qaagiissino.
Albi Ostiriyi- Hangaari biso ikkitinoti mereerimu Awuropira afantannoti Hangaari, Itiphiyu ledo faajjetenni dipolomaasete xaadooshshe hanaffinohu 1956 M.Dirooti.
Bakkalcho Dotteessa 12, 2015 M.D
