Amsaalu Felleqe
Addis Ababa:-Federaalete deerrinni kaajjadonna dhaabbata gobboomite ga’labbote bissa kalaqate assinanni harinsho Sidaamu qoqqowi wo’munni wo’ma gumulinota qoqqowu Keerunna ga’labbote gashshooti biiro egensiissu.
Qoqqowunnita addi wolqa wirro tantanate loosi qaafo gobba kaajjadonna gobboomu ga’labbote bissa kalaqateete ikkinota qoqqowu keerunna ga’labbote gashshooti biiro sooreessi kalaa Alamaayyo Ximootiwoosihu Itophiyu pireesete uurrinshara xawisino.
Qoqqowu addi wolqa miilla hasattonsa garinni gargarooshshu olanto, Federaale poolise hattono uurrinshu poolise karsantanno gede assinoonnita kule; qoqqowu uurrinshu poolise miilla ikkite karsantino miillara uurrinshu poolise loosunnita badooshshu uddano qixxaabbe shiqqa geeshsha albaanni horoonsidhanni keeshshitino loosu uddanonni uurrinshu poolise karsantinota qummeessino.
Gobba diinnatenni danote giddo ubbu yannara qoqqowu addi wolqa lubbonsa kakkalamate geehshsa waaga baatte gobbansa ayirrinye agarsiisatenni luphiima qeecha fultinota qaagiissinohu sooreessu; qoqqowunna gobbate ga’labbo agarantanno gede luphiima qeecha fultinohura galatasi shiqishe; albillichono kaajjado gobboomitte ga’labbote wolqa karsamatenni gobbansara agarranninsa qeecha fultannore ikkansa coyi’rino.
Kalaa Alemaayyehu amadisiiseno, Sidaamu daga diru soorro fiche cambalaallate ayyaani keerunni hanafame keerunni jeefama geeshsha ga’labbote wolqa jawa qixxaawo assitinota kule; ayyaanu lame lamala geeshsha woraddateno ayirrinsanniha ikkasinni biiro illacha tugge loossanno yiino.
Ayyaanu Sidaamunna wo’mante gobbanke dagara keerunniha, baxillunniha, mittimmanna atoomunniha ikkanno gedeno halchosi xawisino.
Bakkalcho Dotteessa 12, 2015 M.D
