Addisu Adoola
Hawaasa: Faasiku ayyaanira mitu mitu laalchi shiqisho anje leeltannota Hawaasi Quchumi teessaano coyidhu. Itophiyu Pireesete Uurrinshara hedonsa uytinori mitu mitu quchumu teessaano Kaote (Faasiku) ayyaanira dikko shiqino laalchi aana waagu lexxo nookkita xawisse; ikkollana, mitu mitu laalchi dikkote aana shiqishote anje leeltannota qummeessitino.
Dikko dikkidhanna anfe hasaawinsoommori mereerinni Dukko Tewaabechi Gebre- Mediini, dikkote aana laalchu waagi ragaanni ayyaanu dikkora albinni woyyinori noota coydhanno. Ayyaana korkaata assine lendanni waagu lexxo nookki gede hedose uytinonketi Dukko Tewaabechi; ikkollana, mitu mitu laalchi shiqishote anje noota xawissanno.
Woleno Hawaasi Quchumi Teessaanchonna Quchumu Loosaasinete Geexaanote Mittimma Loosi Maamari Lay/Murritte Dukko Heven Mulu; Duumo Shunkurta, Quuphenna lawinori dikkote aana shiqishote anje noo gede kayisse; ikkollana, geexaanote maamari shiqishino laalchi dikkote noo waaginni woffi yiino waagira hiramanni afamannota coydhino.
Quchumaho ayyaanu dikko ledo xaadinohunni mitu mitu laalchi anje leeltinota geexaanotewiinni ka’ino hedubbara dawaro afi’rate IPU hasaawissinohu Sidaamu Qoqqowi Daddalunna Industirete Biiro Kominikeeshiinete Dayrektoreete Dayrektere Kalaa Woxe Toshe; Biiro ayyaana irkidhe xaaddara dandiitanno dikkote iibbabbo gargarate tantanamino garinni loossanni noota xawisino.
Korkaatiweello waaga ledatenninna laalcho maaxatenni dikko iibbabbishshanno bissa aana qaafo adhinanni hee’noonnitano coyi’rino. Albankeenni dagganni noo Kaote/Faasiku, Fichee Cambalaallatenna Iidi ayyanna korkaatinni dikkote aana laalchu shiqisho anje heedhannokki gede qoqqowu giddo addi addi quchummara geexaanote maamarra ledo halamatenni ayyaanaho hasiissanno laalchubba waagu lexxo nookki garinni dikko shiqinshanni hee’noonnita qummeessino.
Mito mito darga xaaddara dandiitanno laalchu shiqisho anje heedhuro mittu darginni wole darga tareessatenni daga wodani gede dikkidhanno assate harunso assinanni hee’noonni yiinohu Dayrekterichu; dagano mitto darga hoogganno laalchi wole darga hee’rara dandaannohura mootimma qixxeessitino yannate geeshshi dikko mereershubbara millisse heewisiisse hidhitanno gede qaagiissino.
Ikkollana, sae sae mitu mitu laalchi aana leeltanno waagu lexxora kalaqamunni heedhanno laalchunna lawannori waagi lexxo qara korkaatta ikkitino gede huwachishannohu Kalaa Woxe; dagano tenne huwattara hasiissanno yiino.
Bakkalcho Dotteessa 5, 2015 M.D
