Amsaalu Felleqe
Addis Ababa:- Sidaamu daga haaru diru soorro Fichee Cambalaallate ayyaana iibbadu sai dirinni roore iibbino garinni ayirrisate feeffantoonnita Qoqqowu Woga Turizimenna Ispoortete Biiro egensiissu.
Biironnihu Miseessu Sooreessinna Daa’’attote Handaari Sooreessi Kalaa Abbebe Maarimo Itophiyu pireesete uurrinshara xawisino garinni; tayxeha Fichee Cambalaallate ayyaana budunna balchoomu hornyubbasi agarino garinni ayirrisate balaxote qixxaawo assinanni hee’noonni.
Fichee Cambalaallate ayyaani giddosi hanqafino hornyubba korkaatinni Halantino Mootimmuwa Rosu Sayinsetenna Budu Uurrinshara (UNESCO) borreessaminoha ikkasinni tayxeno babbaxxitino kalqete qooxeessuwanni daggino wisinna leeltinowa budu hornyubbasi agarino garinni ayirrisate feeffantoonni yiino. Ayyaana maatete deerrinni hattono daga mittimmatenni ayirrissanniha ikkano yiinohu kalaa Abbebe; tayxeno baadiyyete qooxeessubbaranna Sooreessu Gudumaalira ayirrinsannita qummeessino.
Ayyaana ayirrisate babbaxxitino kalqenke qoxeessubbanni qoqqowo dagganno wosinna ‘’Dayoe Bushshu’’ yine haa’ne koyisatenna daa’’ataanote kiirono lossate illachiishatenni babbaxxitino hodhishshu owaante hattono qoqqowoho kiironsa 16 ikkitannoti beeddakkote deerri noonsa Hoteellanna woloottano beeddakkote deerri woroonni afantanno Hoteellanna daa’’ataanote owaante uytanno uurrinshuwa hasiissanno owaante uytanno gede assinanni hee’noonnita coyi’rino.
Fichee Cambalaallate ayyaani gudumaaleho woy xawoho ayirrinsanniha ikkasinni tayxeeha ayyaanu amanyoote beeqqitannori daa’’ataano kiirono sai dirinni lexxitanno yine agarrannita xawisino. Ayyaanu haggirrunniha, araarunniha, mittimmanna baxillunniha hattono manchi beettinnino sae kalaqamu baalunkura jawa ayirrinye afi’rino ayyaanaati.
Sidaamu Daga haaru diru soorro ayyaani giddosi hanqafino hornyubbanni amammandannikkinna manchi beetto riqiwannoha kalqete Dona ikke maareekkaminoti qaangannita ikkitanna; kuni Doni wolu ayyaaninni baxxannohu Ayyaanto barra la’e beeddahe kiirte fushshitanno ayyaana ikkasinni tayxeno Cambalaallate Barra murtinota faajjetenni xawinsoonni.
Tayxehu Cmbalaallate ayyaanni qoqqowu deerrinni Dotteessa 11/2015M.D Fiixoori hawarro hattono 12/2015M.D Hawaasi Garbi qaccera afamannohu Sooreessu Gudumaalira babbaxxitino budu amanyootubbanni ayirrinsanniha ikkanna; aanteteno mitte lamalara qoqqowoho baalante baadiyyete qooxeessuwara ayirrisamannotano lede xawisino.
Bakkalcho Dotteessa 5, 2015 M.D
