Abrahaam Saamueel
Adaama:- ‘’Gumaamo xaadooshshe Itophiyu jawimmara” yaanno uminni uynoonnihu qajeelshu kominikeeshiinete (xaadooshshu) loosi guma lossate kaa`lannoha jawa dhuka afi`noonni yaanni Mootimmate Kominikeeshiine Owante Ministir Deetichi Kalaa Kebbede Deesiisi egensiisino.
Itophiyu Pireesete Uurrinsha Kominikeeshinete Massagaanonna ogeeyyete dhuka lossate kaa`lanno qajeelsha gumaamo assa daniitinota Kalaa Kebbede coyi`rino.
Itophiyu Pireesete uurrinsha qajeelshu mereershi Mootimmate Kominikeeshiine ledo halamatenni qixxeessitinoha sa`u shoole barrubbara uynanni keeshshinoonni qajeelshi “Gumaamo xaadooshshe Itophiyu jawimmara” yaanno uminni uynoonnihu Maakisanyote barra goofino.
Pirogiraamete jeefo aana Mootimmate Kominikeeshiine Owaante Ministir Deetichi Kalaa Kebbede xawisanni; gobbate poolisenninna istiraateeje xiinxalline kominikeeshiinete looso loosate kaa`lannoha gumaamo qajeelsha uynoonnita coyi`rino.
Kalaa Kebbede Desiisihu, kominikeeshiinete ogeeyye loossanno looso gobbate mittimma abbate hasiissannonke. Konni garinni, hiikko gari looso loosa dandiinanniro yaannoha leellishino qajeelsha ikkinohura aanno horo jawate yiino.
Kominikeeshiinete massagaanonna ogeeyye gobbate mittimma abbate noonsa qeechi jawaho yiinohu Ministir Deetichu; konne qeechansa garunni fulanna ogimmate dhukinsa jawaatanno gede qajeelsha uynoonnita coyi`rino.
Ledoteno, babbaxxitino qoqqowubbanni dagginorira, federaalete kominikeeshiine massagaanonna ogeeyye mereero noo xaadooshshe kalaqa dandiino qajeelsha ikkinota qummeessino. Kominikeeshiinete loosira jawa dhuka ikkino daafira togoo qajeelsha albillichoteno harinsannita kalaa Kebbede egensiisino.
Itophiyu Pireesete Uurrinsha Kominikeeshinete massagaanoranna ogeeyyete dhuka lossate kaa`lanno qajeelshi aana gumaamo looso loosanni noota xawise; IPU qajeelshi dhuka horonsidhe uurrinshubba hala`lado loossa loosa dandiitannota Deetichu xawisino.
Konni garinni, albilichono harinsanni qajeelsha mootimmate kominikeeshine owaante hasiissanno irko assannota kulino. Kominikeeshinete ogeeyye baalantera iilla hasiissanno qajeelsha ikkinohura, uurrinshanna kominikeeshinete massagaano togoo qajeelsha aatenni hasiissanno irko assa noota sokka saysino.
Qajeelshu wo`munni wo`ma jeefanno gede assitinorira Itophiyu Pireesete Uurrinsha massagaanonna ogeeyyera Ministir Deetichu galata shiqishino. Qajeelshu jeefo pirogiraame aana Kominikeeshinete Owaante Ministercho Deetitte Salaamaawiiti Kaasa; Itophiyu Danote Bidhatto Massago Komishiine Komishiinerichi Ambaasadder Shiferraw Tekilemariam (Dr)na Itophiyu Pireesete Uurrinsha Qaru Loosu Gumulsiisaanchi Kalaa Geetinnet Taaddese battalate afantino.
IPU qixxeessitino ledamate hedo, Haaru paaradaamenna Itophiyu Jireenyi doogo, Dagate xaadooshshi qara hedo, ajanda fushshanna bidhattote yanna, miidiyu gashshonna hasaawu qixxeesso hattono miidiyu bidhattonna yannate hajubba aana qajeelshu borro shiqqeenna hala`lado hasaawa assinoonni.
«Gumaamo xaadooshshe Itophiyu jawimmara” yaanno uminni qixxeessinoonni qajeelshi aana shiqqino borro kominikeeshinete ogeeyye dhuka bowirsate widoonni jawu qeechi noota qajeelshu beeqqaano coyidhino.
Bakkalcho Dotteessa 5, 2015 M.D
