Amsaalu Felleqe
Addis Ababa:- Sidaamu qoqqowira addi wolqa wirro tantanate loosi bayi’riidi seeri garinni gumulamanni noota Qoqqowu Keerunna Ga’labbote Gashshooti Biiro egensiissu.
Biiro tayxee Sidaamu daga haaru diru soorro Fichee Cambalaallate ayyaana ayirrisate qixxaawo lainohunni sa’u muli barrubba giddo hajo la’annonsa bissanni ledo hasaawa assitu yannara, Biirote sooreessi kalaa Alemaayyehu Ximootiwoos tuqu xaadooshshira uyno xawishshinni; mootimmatenni xiinxallo assinoonnihu addi wolqa wirro tantanate loosi gumulshi Sidaamu qoqqowira jeefote fooliishshora iillino.
Kunino, bayiriidi seeri garinni gumulamanni afamanno yiino sooreessu. Xiinxallote garinni addi wolqa wirro tantana kaajjado gobboomitte ga’labbote wolqa kalaqate dandisiisannotano xawisino. Qoqqowu addi wolqa miilla hasattonsa garinni gargarooshshu olanto, federaale poolise hattono uurrinshu poolise karsantanno garinni badate loosi xibbuunni 95% gumulaminota xawisino.
Gobba diinnatenni danote giddo ubbu yannara qoqqowu addi wolqa lubbonsa kakkalamate geehshsa waaga baatte gobbansa ayirrinye agarsiisatenni luphiima qeecha fultinotano huwachishinohu kalaa Alemaayyehu; fultino qeechirano galata shiqishino.
Qoqqowu addi wolqa sase xawinsoonni ga’labbote tantano giddo doodhite karsantanno gede miillatenni ledo torbine sumuu yinoonnitano xawisino. Dagittete qoolira kaphu duduwo fincitannori gobbate ga’labbo hasidhannokkire ikkansa kayisinohu kalaa Alemaayyehu; gobbate kaajjado ga’labbote wolqa kalaqatenni keere buuxisate adhinoonni qaafooti yiino.
Bakkalcho Dotteessa 5, 2015 M.D
